Dialet del Kansai

El dialet del Kansai (in japones: 関西弁 - Kansai-ben - o 関西方言 - Kansai hōgen) a l'è ol termin con qe i se fann su i dialets parlads ind la rejon del Kansai, in Japon. El nom Kansai-ben a l'è qell con qe'l dialet a l'è plussee cognossud ind el paes ma l'è ciamad tecnegament dialet del Kinki (近畿方言 - Kinki-hōgen).

La variant principal del dialet del Kansai a l'è qella de Osaka, ciamada specifigament Osaka-ben (大阪弁), e a l'è anca la variant plussee spantegada e cognossuda fœra del Kansai. La variant tirada a man poc adree la fa su, insema al dialet de Kyoto, el dialet de Kamigata (上方言葉 - Kamigata kotoba, leteralment "Parolle del Kamigata" - o 上方語 - Kamigata-go, leteralment "Lengua de Kamigata"). El dialet del Kansai a l'è caraterizad d'un son plussee melodeg e diret a'l anvers de la lengua japonesa standard.

Presentazion

Dejà qe Osaka l'è la plu granda citaa ind la rejon e i so locutor hann ciapad su la plupart de l'esposizion ai media ind el secol passad, qi qe parla minga el dialet del Kansai pœdaria vesser plussee inclinad a compagnar-g el dialet de Osaka a'l Kansai intreg. De tute i manere, el dialet del Kansai a l'è minga domà vun dialet ma un grup de dialets ligads intra lor. Tute i citaa plussee grandi e i so prefeture inn caraterizade de un dialet particolar e i so residents hann l'orgoi de descompagnar-i vun de l'olter. Contut, fœra d'una quai diferenza plussee grossa, i dialets del Kansai inn intelejibil per l'asquas totalitaa intra lor e i compartissen tuts dei elements comun de la variant parlada ind el Keihanshin (i bande metropolitane dei citaa de Kyoto, Osaka e Kobe).

I dialets del Shikoku e del Hokuriku compartissen assossenn carateristege cont el dialet del Kansai, ma inn classifegads de manera spartida del medem.

La variant de Osaka

L'Osaka-ben (大阪弁: dialet de Osaka) a l'è despess sconfondud cont el grup intreg dei dialets del Kansai ma dei mots qe inn considerads carateristeg del dialet del Kansai inn debon limitads a Osaka e i so bande arente.

Vun dei saluts plussee cognossuds intra i abtiants de Osaka a l'è "mōkarimakka?" qe'l vegn jo del verb mōkaru (儲かる - qe'l fa ciapar su i daner) e'l vœl dir "i vann comè i afari?". Qell qe domanda insì a quaivedun al se speita de sentir-g ol contestar "bochi-bochi denna" innò qe bochi-bochi vœl dir "insì-insì" e qe denna l'è un scurtament de desu-ne rispet a'l japones standard.

La rexon qe la sta dedree de la domanda qì de sora a l'è qe Osaka l'è staita storegament el center del mercad japones. Qell salutar qì al s'è desvilupad intra i venditor de la class inferiora e a l'è drœvad incœ intra fameiar e amix. Anca ol mot bochi-bochi l'è tipeg de Osaka innò qe l'è drœvad per dir qe la situazion l'è adree a vegnir semper plussee bona o qe almanc a l'è minga adree a pejorar. La pœdaria vesser compagnada a'l lombard "tirem inanz" a la domanda "come la va?".

Bochi-bochi l'è drœvad anca per dir "asquas" con l'acent in su la prima sillaba (a'l contrari del "insì-insì" qe'l g'ha in su la terza) inscambi del japones standard soro-soro. Un esempi innò qe l'è doperad a qella manera qì l'è "bochi-bochi ikoka?" ("a l'è asquas l'ora d'andar via" - leteralment sarem asquas adree per andar?)

La variant de Kyoto

Ol Kyoto-ben, ciamad anca Kyo-kotoba a l'è caraterizad d'un desvilupp de indireteza e jentileza. A l'è despess definid un dialet elegant e feminin per i so carateristege e per la figura dei geisha de Gion (geiko-han e maiko-han in dialet de Kyoto), i plu conservatrixe del dialet tradizional. El dialet de Kyoto l'è stait spartid ind un dialet de la cort ciamad Gosho-kotoba (御所言葉) e ind un dei paisan ciamad Machikata-kotoba (町方言葉). Ol prim l'era parlad dei sior de la cort adree qe'l imperador al sia stait desmenad a Tokyo intant qe'l segond a l'è caraterizad de descompagnadure picinine intra tute i classe de la societaa.

El dialet de Kyoto a l'è stait la lengua japonesa standard de facto del ann 794 fina'l secol XVIII e un quai abitant de Kyoto al se inrabiss quand qe i abitants de Tokyo i traten el lor dialet tant'mè un dialet de provinça dejà qe inn ancamò orgoios del lor dialet. De tute i manere minga poqe carateristege tradizionale del dialet de Kyoto inn adree a descomparir, tant'mè ol verb copula dosu (vesser) q'a l'è adree a vesser desimpientad del japones standard desu.

L'inflession in -haru dei verb a l'è un toc important fiss del ciciarar casual ind la moderna Kyoto e l'è considerada plutost informala a'l contrari de Osaka innò l'è considerada plutost formala, poc sota a'l -masu, drœvad per cortesia.

Ai bande plussee a nord de la prefetura de Kyoto al se trœva el dialet de Tango (丹後弁 - Tango-ben) e l'è despess considerad descompagn dessoravia dei dialets del Kansai tant qe l'è sovent ciapad ddenter ind i dialets del Chūgoku. I carateristege qe'l fann vesser insì descompagn dei olter parlade del Kansai inn la copula da (inscambi de desu, pronunçada ind el Kansai con la u finala sonora a'l contrari del japones standard innò qe la se pronunça asquas dés), l'acent e la cadenza compagn a quei de Tokyo, ol verb de cortesia qe'l finiss in -naru tantost qe in -haru e ai qe'l se pronunça [æː] (esempi: 赤い, akai, pronunçad akæː).