Christian Gottfried Daniel Nees von Esenbeck

Chest artícol a l'è scricc in Lumbàrt, ortograféa orientàl unificàda.

Christian Gottfried Daniel Nees von Esenbeck l'è stat en botànich e 'n zoòlogo Todèsch, nasìt ai 14 de febrér del 1776 à Erbach, en paizì del Odenwaldkreis endèl sud de la pruvìncia del Hesse e mórt ai 16 de mars del 1858 à Breslàvia (al dé d'encö Wrocław en Polònia).

Dòpo 'l duturàt de midizìna endèl 1800, l'ensègna botànica a l'üniversità de Erlangen endèl 1818, e pò a Bonn endèl 1819, e a Berlìno endèl 1848. L'è diritùr del Giarì botànich de Erlangen e pò dòpo 'l fónda e 'l dirìge chèl de Bonn (del 1818 al 1830). Endèl 1816, el se önés a l'Académia Leupuldìna, giöna de le asociasiù cültürài piö pristigiùze de töta Europa. Endèl 1818, el deènta presidènt de l'Académia Leupuldìna, pozisiù che manté 'nfìna che 'l scàmpa.

L'è cunusìt come l'autùr de Handbuch der Botanik (du vülüm, 1820-1822), Bryologia Germanica (du vülüm, 1823-1831), Naturgeschichte der europaïschen Lebermoose (quàter vülüm, 1833-1838) e Hymenopterorum Ichneumonibus affnium, Monographiae, genera Europaea et species illustrantes (du vülüm, 1834).

El stüdia suratöt le àlghe de àiva dólsa e i fóns. El gh'ìa apò 'na colesiù importànta de insècc.

Endèl 1848, el se mèt en pulìtica. Per vìa de la sò upuzisiù al goèrno, chèsto 'l ghe ritìra 'l sò 'ncàrech de profesùr e la sò pinsiù. Nees von Esenbeck el mör en cundisiù de poertà.

L'è 'l fredèl de Theodor Friedrich Ludwig Nees von Esenbeck (1787-1837), botànich e farmacòlogo todèsch.

Riferimèncc

Stefan Vidal (2005). The history of Hymenopteran parasitoid research in Germany, Biological Control, 32 : 25-33. ISSN 1049-9644 (WC · ACNP)