Celebrazzion de la Passion del Signor
 |
Quest articol chì l'è scrivud in lombard, con la Noeuva Ortografia Lombarda |
La Celebrazzion de la Passion del Signor (Celebratio Passionis Domini in latin) a l'è la liturgia che la Gesa catolega la fa el Venerdì sant in regord de la passion de Gesù e de la soa mort. L'è la segonda celebrazzion del tridov pasqual e la se ten ai trii ore del dopodisnà, quand che, per i Vangeli, el Gesù l'ha dad foeura el so ultim respir.
Vist che 'l venerdì sant a l'è un dì aliturgegh se celebra minga l'Eucarestia: in del rit roman l'è comunque dada la possibilità de comunicàss cont i particole de la Missa in Coena Domini, menter in del rit ambrosian se po nò. La strutura de la celebrazzion la ved una letura del profeta Isaia, un salmo de risposta, una terza letura (Isaia 52 in del rit ambrosian, che l'è la prima letura romana, un toch de la Letera ai Ebrei in quell roman) e poeu la letura de la Passion: quella de Gioann in del roman e quella de Matee in quell ambrosian, insì de completà la narrativa del dì prima. In tucc e du i rit la gh'è l'orazzion universal, con des intenzion in del roman e vundes in l'ambrosian.
La gh'è poeu un'omelia e l'adorazzion de la Cros, cont una procession. In del rit roman gh'è poeu la comenion e 'l Pader Noster e i sacerdot e i ministrant se ritiren, senza musega ne nient, menter in l'ambrosian, desgià che la gh'è minga la comenion, se dis no el Pader Noster e l'assemblea la se congeda senza nissun cant né nient.
Un'altra carateristega del rit ambrosian a l'è che, quand in del Vangeli l'è nonziada la mort de Gesù, se smorzen tucc i lus, i fedei e i ministrant se meten in sgenoeugg, l'altar a l'è svestid e i pret se caven via i parament, 'na voeulta fad, se torna a la letura.
Prima de la reforma liturgega, e donca anca incoeu in la Messa tridentina, l'era ciamada Messa solenn di pre-santifegad, vist che se doperava l'Ostia del dì adree, e 'l color di vestiment a l'è el negher, menter incoeu a l'è el ross, per tucc i rit latin.