Cecilio Maria Cortinovis
|
Quest articol chì l'è scrivud in lombard, con la Noeuva Ortografia Lombarda |
El fra Cecilio Maria Cortinovis (nassud Antonio Pietro; Nespell, 7 de november 1885 - Berghem, 10 de avril 1984) a l'è stad un religios italian, fondador de l'Oeuvera San Franzesch per i pover de Milan: del 6 de marz del 2018 a l'è stad recognossud del papa Franzesch 'me venerabel.
Biografia
[Modifega | modifica 'l sorgent]De bona familia, el so paa l'era stad sindegh del paes e la soa mam gh'ha fad de guida spiritual, ghe va dent a quatordes agn al terz orden franzescan e 'l 29 de luj del 1908 el ciapa l'abit: l'è mandad del 2010 in del convent milanes de vial Piav, che 'l lassa domà per andà a naja. El ciapa la meningita del 1914 e 'l guariss, el dis per intercession de l'Inocenzi de Berz, al che el sarà semper ligad.
L'è ciamad ancamò soldad in la prima guerra mondial e l'è mandad in di Alpin in del luj del 1916, ma per via del so gram stat de salut l'è mandad indree a la fin de l'ann e, infin, del 1918 l'è reformad del servizzi militar. Tornad in cità el serniss de dà i vot perpetov e de vesser ordenad sacerdot, oltra che secrista.
Del 1921 l'è fad portiner e responsabel de andà a fà el circot, e 'l porta a un cresser di donazzion del pan del 25% e del 1927 el collabora a la catada per fà su el monument al san Franzesch d'Assisi che gh'è in piazza Resorgiment: el scultor, el Domenico Trentacoste, el se ispirarà a la facia del Cecilio, che gh'haveva cuntad su la storia del Franzesch.
In la segonda guerra mondial el fa del so convent un sit de ajut per la popolazzion milanesa e, de scondon, ghe dà de mangià anca ai sgiudee perseguitad: el va inanz fina a fà su, del 1959 e cont el permess del Giovann Batista Montin, l'Oeuvera San Franzesch per i pover e per 'sto mester el comun ghe dà la medaja d'arsgent del 1969 e del 1973 la provincia ghe dà quella d'or.
El moeur in del convent franzescan de Berghem, indova che eren dree a curàll, e 'l so corp l'è portad indree in la gesa di Capucin di franzescan capucin milanes, e l'è mitud sota lilinsì. Del 1996 el Carlo Maria Martini el nomina servidor de Dio e 'l fa scomincià la causa de beatificazzion, cont el Papa che 'l reconoss venerabel el 6 de marz 2018.
Riferiment
[Modifega | modifica 'l sorgent]Alter proget
[Modifega | modifica 'l sorgent]
Wikiquote el gh'ha dent citazzion de o su Cecilio Maria Cortinovis
Wikimedia Commons el gh'ha dent imagin o alter archivi su Cecilio Maria Cortinovis
