Bože Pravde
 |
Quest articol chì l'è scrivud in lombard, con la Noeuva Ortografia Lombarda |
Bože Pravde (Dio de giustizzia in serb) a l'è l'inn nazzional doperad in Serbia, fad del 1872: la musega l'è del Davorin Jenko e 'l test del Jovan Đorđević.
L'è stad sernid 'me inn del Regn de Serbia del 1882 e del 1919 el noeuv Regn de Jugoslavia el fa el so noeuv a met insema l'inn di serb, quell di croat e quell di sloven. Cont el borlà sgiò de la monarchia, l'ocupazzion fassista e la liberazzion la noeuva Jugoslavia Democratega Federal la cambia inn, a sernì Hej, Slaveni, senza riferiment a la monarchia o a Dio.
L'è tornad inn de la Serbia del 2006, quand che da la Serbia e Montnegher el s'è spartid el Montnegher: prima, vist che serb e montnegrin trovaven no 'n acord, l'era restad el vegg inn jugoslav.
L'è stad anca l'inn de la Republega Serba de Bosnia e Erzegovina del 1992 al 2008, quand che la Cort Costituzzional bosniaca l'ha deciarad incostituzzional, perchè el representa domà vun di popoi: l'è stad sostituid de Moja Republika ma del 2024, cont i tension in tra Sarajevo e Banja Luka in cresser, a l'è aprovada una lesg noeuva che 'l reconoss 'me simbol de la Republega, senza però fàll 'me inn.
Anca la Republega de la Krajina Serba ghe l'ha havud 'me inn per tuta la soa esistenza del 1991 al 1995.
Riferiment
[Modifega | modifica 'l sorgent]Alter proget
[Modifega | modifica 'l sorgent]
Wikimedia Commons el gh'ha dent imagin o alter archivi su Bože Pravde
