Bataia de Varna
|
Quell articol qì l'è scrivud in Lombard, cond l'ortografia Scriver Lombard. |
La bataia de Varna l'è stait un fait bellig de la croxada de Varna. L'è staita combatida aprœv a la citaa de Varna ol 10 de november del 1444, in tra i forze croxade e Otomane.
Ol contest[Modifega | modifica 'l sorgent]
In seguet a l'espansion dei Otoman in dei Balcan, ol princep ungeres Jànos Hunyadi l'ha ciamad una croxada per descaçar-i vià dai territore europee. Anc se ol Papa l'ha dait ol so apoj, i ha respondid adoma ol Ladislav III Jagellon, Re de Polonia e Ungeria, e ol Vlad Tepes de Valaqia. Grazie a la flota veneziana qe, col blocar ol streit dei Dardanei, la tegniva lontan l'esercet de la part asiatega, i croxads era dree a vencer la guerra, tant qe ol sultan Murad II l'hera domandad un armistizi, in cambe de la cession d'un quai territore a Serbia e Ungeria, e l'impegn a miga tacar i regn cristian per dex agn. Ma l'hiva miga assee per i croxads qe i è indaits inants ind la guerra. Ma 'sta volta, grazie a i condizion atmosferige o a la corruzion d'un quai capitani, l'esercet oriental dei otoman al g'è rivad a passar a travers ol Bosfor, e i cristian i s'è trovads in inferioritaa numeriga.
I forze in camp[Modifega | modifica 'l sorgent]
Al comand del Ladislav i g'era circa 20 000 omegn, ol sultan inscambe al pudiva cuntar in su una armada qe l'è granda ol dope, circa 40 000 omegn.
La bataia[Modifega | modifica 'l sorgent]
I cristian i se sqiera intra ol lag Devna (a manzina) e i colline verso Varna (a dreita). I turc i met a manzina i trœpe asiatege, a dreita qelle europee, e ind el mez ol sultan coi janisser, protejids de dei pai gœss, conligads con dei cadene.
Ol prim assalt l'è dei turc, qe i conquista i colline tegnide da i cristian, ma i è descaçads del contratac del Hunyadi, qe al copa anc'pò ol comandant dei trœpe asiatege, Qaragia. Anc ind la banda manzina i cristian i è dree a vencer, e la bataia l'è in so favor, quand qe ol Ladislav, senza speitar i rinforz, con la so guardia polaca al carga contra i janisser per circar de copar ol sultan e meter fin subet a la guerra. Ma ol so cavall l'è colpid e lu, borlad in terra, l'è copads; la so testa l'è portada al sultan e metida sora un pal, per far-la veder ai cristian, qe i sa ritira e i lassa sul camp 5 000 morts (ma anc i turc i ha havud dei grande perdide).
I conseguenze[Modifega | modifica 'l sorgent]
La fraca de l'armada cristiana la segnerà la fin dei tentativ ocidentai de descaçar i turc de i Balcan. Costantinopel, bandonada dei latin, gnanc dex agn e la finirà in man ai Otoman.
Bibliografia[Modifega | modifica 'l sorgent]
- (IT) Andrea Frediani, La storia del mondo in 1001 battaglie, Newton Compton Editori, ISBN 9788854181991, ISBN 9788854188037