Atmosfera terrèster

De Wikipedia
Sata a-a navegassion Sata a-a serchia
Lumbard ucidental Quest articol chì l'è scrivuu in lombard, grafia milanesa.
L'atmosfera terrèster vista da la Stazione Spazial Internazional

L'atmosfera terrèster a l’è el strato de gas che ’l rivèst el pianètta Tèrra, tegnùu giò grazie a la forza de gravità, e ‘l ghe partecipa per la pupàrt ind el sò girament. Cont ona composizion chimica varia, la gh’ha ‘na struttura puttòst complèssa e spartida in cinch strat, ciamàa sfer, ricavada da i inversadur del sò gradient tèrmich vertical, che a partìi del pussée bass hinn: troposfera, stratosfera, mesosfera, tèrmosfera, ionosfera ed esosfera. In su la superfice che la segna el confìn infra du strat gh’è ‘na inversadura de la temperadura ciamada "pàusa". El studi de tucc i aspètt de l’atmosfera l’è denter in del grupp di disciplìnn di scienz de l'atmosfera.

Descrizion[Modifega | mudìfica 'l sorgènt]

Modèll de l'atmosfera terrèster

Composizion[Modifega | mudìfica 'l sorgènt]

Senza considerà la presenza di polver, i aerosòl e i inquinant miss denter de i òmen, l’atmosfera terrèster la pò vèss considerada ‘me ‘na mes'ciada de gas che, in del caso de l’aria sècca, o ben senza consideràa el vapor de la acqua, al soeul la gh’ha sta composizion chimica chì (percentuaj scrivùu in sul volumm):[1][2]

Adrèe a quèj gas chì gh’hèmm de giontagh el vapor de acqua (H2O), che la soa percentual a l’è puttòst variàbel (dal 0% al 6%), cont ona media del 0,33%}}.

Minga tucc i strat gh’hann i stèss concentrazion de gas: per esempi el vapor de acqua el gh’è aquas domà ind la tropofera, el strat pussée de bass, e ghe n’è quasi nagòtt ind la tèrmosfera e ind l’esosfera, che inscambi gh’hànn quasi tutt l'elio e l'idrogeno. La concentrazion del vapor de acqua ind la troposfera, ancasì, l’è nò costanta , ma la varia anca in manera fòrta de on sit a l’alter e in del cors del temp ‘me conseguenza del temp atmosferegh o ben per via di procèss de svaporament e condensa, fasi che hinn compres in del ciclo de l'acqua. L'ozòno l’è contegnùu per la pupàrt ind la stratosfera [4] indoe ‘l fa su on strato important: l'ozònosfera.

La composizion di gas de l'atmosfera l’è minga stada semper quèla de adèss, ma in del cors de la storia della Terra l’è cambiada molto.

A gh'è divèrsi fattor che indusen di perturbazion di component de l'atmosfera:[5]

  • meccanismi radiativi: la radiazion solar in del camp visìbel o arent a l'ultraviolètt la ghe mètt la lisca o favorìss di reazion che succeden ind l'tmosfera. N'è d'esempi ireazion del Chapman de la trasformazion infra l'ozòno e l'ossigen.
  • meccanismi biològich: per via la respirazion e la fotosintesi di organismi vivent.
  • meccanismi geològich: eruzion di volcani e alter esalazion ind l'atmosfera ghe metten denter ind l'atmosfera di sostanz chimegh.
  • meccanismi coasàa de l'òmm: l'òmm cont i sò attivitàa mett dent di sostanza ind l'atmosfera (inquinament atmosferegh).

Dati tècnich[Modifega | mudìfica 'l sorgènt]

La massa atmosferega a l’è de pressappòch 5,15 × 1018 ,[6] che i sò trìi quarter hinn contegnùu denter in di primm M|11|ul=km}} de altèzza.

La pression atmosferega media in sul livèll del mar, o ben el pes medi de la porzion d'atmosfera che la sta sora ‘na superfice orizzontal situada al livèll del mar dividùu per l’area de chèsta superfice chì , la var 1013 hPa. L’è l’istessa de quèlla che la farìss, al so fondament, ona colòna de acqua alta on zic pussée de 10 . Chèla valor chì, l’è stàa decìs per l’unitàa de misura de la pression ciamada atmosfera.

La Pression e la densità diminuìssen in manera pu o men esponenzial con la quòta, inveci la variazion de la temperadura la gh’ha on andament del tutt particolar, in reson de l’assorbiment de la radiazion solar e de quèlla terrèster. Second la classificazion pussée doprada i inversadùr del gradient tèrmich vertical marchen i confin fra i vari strat atmosferegh.

El ciel l’è bleou per via de la diffusion del Rayleigh de la component bloeu del spèttro visibel de la radiazion solar, manemàn maggior con l’aumentà de la densità de l’aria.

L'atmosfera terrèster la gh’ha no on confin esterno nètt, ma la sfuma adasi vèrs el spazzi, e ‘l so color el passa manamàn de l’azzur al bleou, fin al negher scur scur in del voeud in tra i pianètta.

Proprietàa fisich[Modifega | mudìfica 'l sorgènt]

El spessor de l'atmosfera terrèster, segond i grandèzz dopràa de la fisica di particól, el po’ vèss inscì scrivùu indoe a l’è l'altèzza dell'atmosfera e a l’è la densità, inscì de tegnìi in cunt quant ‘è el material el ven incontràa di particól che intravèrsen l’atmosfera. In del noòst caso l’atmosfera a l’è intraversada di ragg còsmich e ‘l sò spessor a l’è . Quèst l’è l’istèss de circa 27 vòlt , che l’è lunghèzza de radiazion ind l’aria con e a circa 11 vòlt lalunghèzza d'interazion adrònica, definida come interazion de on proton con l'aria: [7]

Marej atmosferegh[Modifega | mudìfica 'l sorgènt]

Le marej atmosferegh pussée important hinn generàa soratutt ind la troposfera e ind la stratosfera indoe l’atmosfera la pò vèss scadada in manera periòdica grazie al fatt che ona part del vapor de l’acqua e del'ozòno la surbìss la radiazion. I marej generàa hinn peou bon de propagàss de quèj region chì andando su fin a la mesosfera e a la tèrmosfera. I marej atmosferegh pòdenn vèss misuràa ‘me variazion regolar del vent , de la temperadura, de la densità e de la pression. Impunemànch i marej atmosferegh abbìen tant in comun cont i marej di ocean a se desferenzien de quèj chì per dò caratteristich important:

  • prima de tutt hinn provocàa del riscaldament de l’atmosfera per mèzz del sol, inveci quèj di oceani hinn soratùtt provocàa del camp gravitazional de la luna. De conseguenza la pupàrt di marej atmosferich gh’hann di perìod de oscillazion conligàa con la durada de 24 or del dì solar, inveci quèj de ocean gh’hànn di perìod pussée lungh de già ch’hinn conligà cont el dì lunar (temp tra el passagg de la luna e ‘l sò passagg adrée) che l’è de circa 24 or e 51 minùt.
  • si propaghen in on'atmosfera indoe la densitàa la varia tant con l'altèzza. De conseguenza i oscillazion de la marea vegnen manemàn pussée grand come che la marea la raggiòng di region semper pu srarìd de l’atmosfera. Al contrari, la densità di oceani la varia domà pòch con la profonditàa, e donca la gradèzza di oscillazion di marej la varia minga con la profonditàa.

Impunemanch el calor del sol el sia el reponsabil principal de quant i oscillazion di marej atmosferegh hinn ampi, i camp gravitazional del Sol e de la Luna pròvochen anca lor di marej atmosferegh. Compagn de quèl che ‘l succed in di oceani i marej che succedden per via del camp gravitazional hinn anmò pussèe ampi de quèj generàa del camp solar (de fàtt quèj chì pòden vèss consideràa trascurabil).

A livèll del soeul, i marej atmosferegh pòden vèss oscillazion piccol de la pression in su la superfice con perìod de 24 e 12 or. Tuttamanch, a altèzz maggior, i marej diventen molt grand. Ind la mesosfera (altèzza de ~ 50 - 100 km) i marej atmosferegh poden raggiòng ‘na velocità de 50 m/s e hinn despèss la càosa principal di moviment de l’atmosfera.

Strat atmosferegh[Modifega | mudìfica 'l sorgènt]

Per comenzà, s’è sòlit a divid l’atmosfera in tre strat segond la sò composizion chimica:

  • l'omosfera comprésa tra el seoul e i 100  de quòta indoe la composizion chimica média la se manten pressappòch costant[6] per via di mòt verticaj che mesturen. L’è fada su soratutt de azòto, ossìgen e argon.[4] Ind l’omosfera gh’è dent el 99.999% de la massa de tutta l’atmosfera.[4]
  • l'eterosfera de la de i 100 km de quòta, indoe se troeuva n‘alta concentrazion de atomi de ossìgeno ligà nò insema in molecol (O), prodòtt per via de fenòmen de fotòlisi;[4]

De sòlit, ancasì se divid l’atmosfera segond i sò parametri pricipaj, ch’infra de lor el primm a l’è la temperadura.

Troposfera[Modifega | mudìfica 'l sorgènt]

Exquisite-kfind.png Per savenn pussee, varda l'articol Troposfera.
I strat de l'atmosfera terrèster.

A l’è el strat indoe i succeden quasi tucc i fenòmen meteorològich e la gh’ha dent el 80% de la massa di gas complessiva e el 99% del vapore de l’acqua: l'aria de la troposfera a l’è scaldata da la superfice terrèster e la gh’ha ‘na temperadura che la diminuìss con l'altèzza fin ai circa −55 °C de la tropopausa. L'aria di strat pussée de bass, che la tend a’ndà su, l’ingenera di grand corrent convettiv che originen i vent equatorial costant (i aliséi); quèl effètt chì el se mètt insèma al’inscì ciamà "effètt Coriolis" caosàa del girament de la térra, e tutt e du ghe laoren adrée a la circolazion atmosferega e i perturbazion atmosferegh.[4]

La troposfera la gh’ha on spessor variàbel second la latitudin: ai pòli la gh’ha on spessur in media de 8 km inveci 20 km sora l'equator. La pression atmosferega la diminuìss con l’altèzza second ‘na legg de prima approssimazion esponenzial; oltra i 7–8 km de quòta la pression a l’è inscì bassa che a se riéss pu a respiràa senza doperàa i mascher conligàd cont i bómbol de ossìgen.

A andà su in quòta oltra i 5 km, minga domà la pression e la temperadura, ma anca contegnùu de vapor de l’acqua de l'aria el diminuiss,[6] inveci sòta i 5 km l'umidità l’aumenta con la distanza dal soeul.[6] D’on cèrt ponto la temperadura la si stabilizza a circa −55 °C circa: a l’è la tropopausa, la zona di passàgg infra la troposfera e la stratosfera.[4]

La paròla troposfera la ven dal grècch τρόπος (trópos) che ‘l voeur dì "variazion, cambiament" proppi perchè dent in sta sfera chì se toeuven tutt quèj mòti d’aria verticaj e orizzontaj che mestùren l’atmosfera medésima e caratterizzen la variabilitàa del temp atmosferegh. La troposfera a l’è ancasì el loeugh de la vita, minga domà di fenòmen meteorologich: tucc i piant e tucc i èsser vivent ghe viven denter e doperen quajvon quaj gas che l’è fada su, oltra a profittàa de la radiazion solar che la riva giò al soeul.

Stratosfera[Modifega | mudìfica 'l sorgènt]

Exquisite-kfind.png Per savenn pussee, varda l'articol Stratosfera.

A lè el strat atmosferegh che ‘l stà sora la troposfera e ‘l riva fin a ‘n’altèzza de 50–60 km. Chichinscì el succed el fenòmen de l’ inversadura tèrmica: ind la troposfera la temperadura la diminuìss con l'altezza, inveci ind la stratosfera l’aumenta, fin a la temperadura de 0 °C. Quèst fenòmen chì l’è caosàa de la presenza d’on strat de ozòno (molecola de tri atomi de ossigen), l'ozònosfera, che la surbiss su la pupàrt di radiazion solar ultraviolètta (UV) (circa el 99%). In on quaj sit de l’ozònosfera el strat de ozòno l’è diventà tròpp suttil (fenòmen del bus del’ozòno, scopèrt ind la zòna antartica) iscì che l’è pu bon de dà assée protezion di ragg ultra-violètt che, in quèj conidizion chì, riessen a raggiòng in gran quantità el soeul terrèster.

Sti ragg chì ghe caosen di dagn seri ai vegetaj e in general a tucc i èsser vivent. I dagn per l’òmm pòden vèss i tumor de la pèll e el vèss òrb, per via di dagn a la retina de podè pu faj tornà indrèe. Ind la stratosfera i component hinn semper pu srarì, el vapor de l’acqua e ‘l pulviscol atmosferegh diminuissen; gh’è ancamò on quaj rar fenòmen meteorològich e di particolar tipi de nivol (per esempi i nivol de madrèperla).

Mesosfera[Modifega | mudìfica 'l sorgènt]

Exquisite-kfind.png Per savenn pussee, varda l'articol Mesosfera (atmosfera).

In sta zòna chì, che la va dai 50 ai 90 km de quòta, l'atmosfera la subìss pu l’effètt de la superfice terrester e l’è l’istèssa a tucc i latitidin. A l’è caratterizzada de element gazos molto srarìi e de ‘n’aument de quèj pussée legger, inveci quej pussée pesant diminuissen. In sta part chì de l'atmosfera la temperadura la taca de noeuv a’ndà giò con l’altèzza e la raggiòng el so valor pussa bass, variabel tra i −70 ed i −90 °C, a circa 80 km; a sta quòta chi se pòden notà di vòlt i nivol nòtt-sberlusent, fàa su probabilment de cristall di giazz e polver piccolissim: a se pòden vedè d’estaa, al crepuscol e se presenten ‘me nivol suttil e sberlusent, inluminàa con vigor di ultim ragg del Sol. De ‘me paren chi nivol chì se capiss che a gh’è on complèss de corrent aerej, de andadura variabel, che la raggiòng di velocità fin a 300 .

I variazion de altèzza de la mesopausa dependen de sti mòti chì, compagn de quèl che ‘l succed ind la tropopausa e ind la stratopausa. In sti condizion chì i gas se piazzen a strat per le fenòmen fisich de la diffusion e la composizion chimica de l’aria la cambià con la quòta. El biossid de carbòni el descompar a la svèlta, el vapor de acqua anmò pussée in prèssa e anca la percentual de ossigen la taca a diminuì con la quòta. Vann su inveci i percentual de gas legger ‘me l’elio e idrògen. L'effètt de riscaldament de l'ozòno l’è finìi e la temperadura la dimnuiss menemàn che la quòta la va su fin che la se stabilizza al confin de sura de la mesosfera (−80 °C ind la mesopausa).

In quèl strat chi se formen i "stell che se mocchen", o ben i piccol meteorit che de sòlit riessen minga a raggòng la superfice terrèster e brusen innanz de rivà giò in tèrra, lassand di fris sbarlusent. De la de la mesopausa, alla quòta de circa 100 km, l'aria l’è inscì srarìda che la ghe fa pu resistenza palpabil al mòto di còrp, e ‘l diventa possibil a moeuves de mòto òrbital. Per sta reson chì, in astronautica la mesosfera l’è considerada el confin cont el Spazzi.

Tèrmosfera[Modifega | mudìfica 'l sorgènt]

Exquisite-kfind.png Per savenn pussee, varda l'articol Tèrmosfera.

La tèrmosfera è el strat dòpo la Mesosfera. La temperadura, dòpo vèssess sbassada ind la mesosfera, la taca de noeuva a cress con la quòta. Di dat sperimental se dis che a ‘n’altèzza de circa 300 km la temperadura la sarìss de 1000 °C. L’è paradossal che i astronauta che se troeuven a chèl’altèzza chi gh’hann de mètt su di tòni riscaldà de morì nò del frècc impunemanch el gas che gh’è intorna gh’abìa ‘na temperadura maggiora de quèlla di tòni e donca ghe ceda el calor. La reson de chèll fàtt chì a l’è che l’aria l’è inscì srarida che la quantitàa de calor che la pò ced a al tòni per conduzion l’è parècc inferiora de quèlla che ‘l tòni el mòlla per irradizion

Ionosfera[Modifega | mudìfica 'l sorgènt]

Exquisite-kfind.png Per savenn pussee, varda l'articol Ionosfera.

La ionosfera a l’è el strato de atmosfera indoe i gas atmosferegh hinn ionizzàa: la fa su i strat esterni de'atmosfera, indoe quand che la radiazion solar la riva ghe strèppa via i elettron di atomi e di molecol. La gh’ha dent, in del so insèma, ‘na frazion minima de la massa gazosa atmosferica, circa domà el 1% (l’è estremament srarìda), ma la gh’ha on spessor d’ona quaj centèna de chilometri e la surbiss ‘na bona part di radiazion ionizzant che vegnen del spazzi. La temperadura in quèll strato chì la va su con l'altèzza, per l'irradiazion del sol, e la riva ai 1700 °C in sul sò bòrd de foeura. La gh’ha ‘na struttura a bind, divis in del cors del dì per via de la fòrta radiazion solar che la preferiss de ionizzà gas divèrsi a quòt divèrsi: de nòtt, quajvuna de sti bind chì la mètt insèma, inscì che la riflettività radio de la ionosfera l’aumenta.

Infra la mesopausa e la ionosfera succeden i auròra polar.

La composizion chimica l’è anmò compagna de quèlla media, dòminen l’azòto e l’ossigen, ma la cambia manemàn che se va su in altèzza. A la quòta de circa 550 km, sti du gas chì hinn pu i component principaj de l’atmosfera, ma vegnen desfesciàa de l’idrògen.

La ionosfera la gh’hà ‘na granda importanza in di telecomunicazion perché l’è in bona de riflètt i ond radio, de già che je ajuta a propagàss oltra l’orizzont visìbel: tra i 60 e i 80 km vegnen riflettùd i ond longh, tra i 90 e i 120 i ond medi, tra i 200 e i 250 le ond curt, tra i 400 e i 500 km i ond curtissim.

Esosfera[Modifega | mudìfica 'l sorgènt]

Exquisite-kfind.png Per savenn pussee, varda l'articol Esosfera.

A l’è la part pussé de foeura de l’atmosfera terrèster, indoe la composizion chimica la cambia del tutt. L'esosfera la gh’ha minga on vèr confin de sora e la sfuma manemàn vèrs el spazzi inter-planetari fin anca a ‘vègh denter ‘na part di fass del van Allen. Denter ind l’esosfera a se pò diasegnà ona linea ideàl (molto arbitraria e variàbel e donca minmga reconossoda per via offiziàl) ‘me confin de la zòna indoe la [[forza de gravità] l’agìss (franza atmosferega), de là del qual on oggètt el subìss pu la forza de gravità terrèster e ‘l scappa via in del spazzi. I sò costituent, ‘me giamò dìtt, hin soratutt l’idrògen e l’elio, in maggioranza vegnùu foeura di particùl del vent solar traà denter da la magnetosfera terrèster (l'idrògen qualora el sia mandàa foeura da la Terra el raggiòngirìss minga tale altèzza: el se òssida in acqua se non alter quand che ‘l raggiòng l'ozonosfera).

Per mèzz de metod de osservazion indirètt e per via de càlcol teòrich a se ricava che la temperadura de l'esosfera l’aumenta con l'altèzza fino a raggiòng, o anca andà oltra i 2000 °C (de temperadura cinetica). A càosa de sta temperadura chì, quajvuna di molecol la raggòng la velocità de fuga terrèster (11,2 ) e scappen via de l’atmosfera, perdendoss in del spazzi.

Influenz terrèster in su l'atmosfera[Modifega | mudìfica 'l sorgènt]

Influenza di giazzee polar[Modifega | mudìfica 'l sorgènt]

I giazzee influenzen el clima de tutt el pianètta per divèrsi resón:[8]

Influenza di giazzee terrèster[Modifega | mudìfica 'l sorgènt]

Quand che i giazzee terrèster quatten el soeul ne ridusen la quantitàa de ròcc liber disponibil per l'assorbiment de l'anidride carbònica. Se ghe n'è pussèe giazzee, la ven trada via de men l'anidride carbònica de l'atmosfera, quèst el fà de manera de 'veghen pussée de effètt sèrra (de già che l'anidride carbònica a l'è on gas sèrra), l'aument de l'effètt sèrra el fa de manera de 'vègh men giazzee e donca pussèe anidride carbònica trada via de l'atmosfera, donca men effètt sèrra, donca pussèe de giazzè. A l'è on ciclo a retroazion negativa.[9]

Inscambi, In del caso de la tundra, però i giazzee che se deslenguen fànn de manera de trasformà la tundra ind ona padù indoe a se ingenera del metano ch'a l'è on gas sèrra.[9]

Influenza di bosch[Modifega | mudìfica 'l sorgènt]

I busch, per mèzz del procèss de la fotosintesi clorofilliana contribuìssen a trà foeura l'anidride carbònica de l'atmosfera, ancasì i bosch fànn andà su el fluss de vapor de acqua vèrs l'atsmosfera. Soratùtt in di clima cald, indoe la svapo-traspirazion di piant a l'è alta, la presenza di piant l'aumanta anca la possibilità de formazion di nivol.[9]

Influenza di vulcan[Modifega | mudìfica 'l sorgènt]

Ieruzion di vulcan mètten denter ind l'atmosfera terrèster on mucc de aerosòl che 'l sò effètt principal a l'è quèl de fermà la radiazion solar dirètta vèrs el soeul, inscì de sfreggì pussée l'atmosfera che gh'è de sòta. I aeròsol miss denter per via di eruzion vulcanich de diametro minor de 5 μm (de già che i partìcol che se mettèn in mèzz a dispèrd la radiazion in quèj che gh'hànn 'na lònghezza d'onda compagna de lee d'accòrd con la leg del Mie e la leg del Rayleigh) hinn bon de dispèrd la radiazion solar ma minga quèlla terrèster che inveci l'indùsariss l'effètt sèrra. Per quèj resón chì la temperadura, per via di eruzion vulcanich, la se sbassa. I vulcan però mètten denter ind l'atmosfera di solfaa ch'hinn bon de trasformà i clòrofluòrocarburi in di sostanz anmò pussée bon de destrugà al strat de ozòno (favorissen donca el bus del'ozòno). [10]

Per via de la fórmola chichinscì a l'è possibil valutà la riduzion de l'intensità de la radiazion caosàda di eruzion di vulcan:[11]

indoe:

I a l'è l'intensità de la radiazion incidenta innanz de la nivola vulcanica;
Ix a l'è l'intensità de la radiazion che la riva giò al soeul dòpo de vègh intraversà la nivola vulcanica;
n a l'è el numer di partìcol per centimeter cubo de nivola;
r a l'è el ragg di partìcol in centimeter;
x a l'è el spessor de la nivola volcanica in centimeter.

Influenza di attivitàa de l'òmm[Modifega | mudìfica 'l sorgènt]

L'òmm cont i sò attività (soratutt la combustion e quand che vegnen toeu giò i alber) mètt dent ind l'atmosfera di gas che pròvochen l'inquinament atmosferegh e i sò conseguenz negativ compagn de:[12]

Exquisite-kfind.png Per savenn pussee, varda i articoi Inquinament atmosferegh, Gas sèrra e Effètt sèrra.

Evoluzion de l'atmosfera terrèster[Modifega | mudìfica 'l sorgènt]

Riferiment[Modifega | mudìfica 'l sorgènt]

  1. (EN) IUPAC Gold Book, "composition of pure air"
  2. Mario Giuliacci (2010). Manuale di meteorologia (in italian). Alpha Test, 73. ISBN 88-483-1168-7. 
  3. (EN) CO2.earth, "Earth's CO2 Home Page"
  4. 4,0 4,1 4,2 4,3 4,4 4,5 4,6 (EN) Thermopedia, "Atmosphere"
  5. Mario Giuliacci (2010). Manuale di meteorologia (in italian). Alpha Test, 76. ISBN 88-483-1168-7. 
  6. 6,0 6,1 6,2 6,3 (EN) Thermopedia, "Physical properties of atmosphere"
  7. (EN) The Review of Particle Physics (particle data group)
  8. Mario Giuliacci (2010). Manuale di meteorologia (in italian). Alpha Test, 141. ISBN 88-483-1168-7. 
  9. 9,0 9,1 9,2 Mario Giuliacci (2010). Manuale di meteorologia (in italian). Alpha Test, 142. ISBN 88-483-1168-7. 
  10. Mario Giuliacci (2010). Manuale di meteorologia (in italian). Alpha Test, 143. ISBN 88-483-1168-7. 
  11. Mario Giuliacci (2010). Manuale di meteorologia (in italian). Alpha Test, 144. ISBN 88-483-1168-7. 
  12. Mario Giuliacci (2010). Manuale di meteorologia (in italian). Alpha Test, 144-156. ISBN 88-483-1168-7. 

Bibliografia[Modifega | mudìfica 'l sorgènt]

Vos correlàa[Modifega | mudìfica 'l sorgènt]

Ligamm de foeura[Modifega | mudìfica 'l sorgènt]