Apucaliss Capitel Vot

De Wikipedia

Lombard Occidental

Quel articul chì l'è scrivüü in Lumbard, cun l'urtugrafia insübrica ünificada.

Apucaliss[Modifega | modifica 'l sorgent]

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Vot[Modifega | modifica 'l sorgent]

1E quand l'ha dervii 'l sètim sigìll, l'è devegnüü silénzi circa un mèzz'ura. 2E huu vedüü i sètt àngiul che hinn staa in pee denanz a Diu, e gh'hinn daa sètt tromb.
3E un alter àngiul l'è vegnüü e l'è staa in pee sül altar avendugh un trümbúl d'or, e gh'è daa tant incèns, perchè 'l dàss a i preghér de tücc i sant sül altar d'or che [l'è] denanz al tronu. 4E 'l fümm de l'incèns l'è naa sü a i preghér di sant de la man del àngiul denanz a Diu. 5E l'àngiul l'ha ricevüü 'l trümbúl e 'l l'ha impienii del fögh del altar e 'l [l']ha bütaa in de la tèra, e l'è staa trùnn e vús e lüsnad e un teremòt.
6E i sètt àngiul che gh'hann i sètt tromb i hann preparaa perchè i sunàssen.
7E 'l primm l'ha sunaa la tromba: e la gh'era tempesta e fögh mesedaa cun sangh e l'è staa bütaa in de la tèra, e 'l tèrz de la tèra l'è staa brüsaa sü e 'l tèrz di piant l'è staa brüsaa sü e ogni vèrda èrba l'è stada brüsada sü.
8E 'l segund àngiul l'ha sunaa la tromba: e cuma una granda muntagna brüsand cun fögh l'è staa bütaa in del mar, e 'l tèrz del mar l'è devegnüü sangh 9e l'è mort el tèrz di creadür che [l'è] in del mar che gh'hann anemm[1] e 'l tèrz di barch hinn staa destrütt.
10E 'l tèrz àngiul l'ha sunaa la tromba: e l'ha burlaa giò del cél una granda stèla brüsand cuma un lümm e l'ha burlaa giò sül tèrz di fiümm e sü i surgént d'aqua, 11e 'l nomm de la stèla l'è dii Medeghètt, e 'l tèrz di acqu l'è devegnüü in de medeghètt e tant di vèss üman hinn mort di acqu perchè hinn staa faa mar[2].
12E 'l quart àngiul l'ha sunaa la tromba: e 'l tèrz del suu l'è staa culpii e 'l tèrz de la lüna e 'l tèrz di stèll, perchè el füss faa scür el térz de lur e 'l dì 'l splendèss no, el sò tèrz, e la nocc in de l'istèssa manéra.
13E huu vedüü, e huu sentii un àquila vuland in mèzz-cél disend in d'una granda vús: «Guai, guai, guai quij che stann de cà sü la tèra del rèst di[3] sún de la tromba di trii àngiul che stann per sunàla.

  1. o vid
  2. It. amaro
  3. leteralamént, i rimanent

Navigaziun[Modifega | modifica 'l sorgent]