Aogashima
 |
Quell articol qì l'è scrivud in Lombard, cond l'ortografia Scriver Lombard. |
Aogashima-mura (in japones 青ヶ島村) a l'è un paisot qe'l se trœva su l'isola de Aogashima (in japones 青ヶ島), un'isola volcanega ind la banda del mezdì del roç de isole Izu (in japones 伊豆諸島, Izu-shotō). A l'è governad de la jurisdizion de la sotaprefetura de Hachijo de la citaa metropolitana de Tokyo.
Introduzion
[Modifega | modifica 'l sorgent]In su l'isola ge viven 156 aneme (a'l 1° dexember 2025)[1] e l'è l'aministrazion locala plussee picinina del Japon.[2] L'etaa media de la popolazion a l'è a l'arionda de 40 agn, qe l'è un'etaa plutost bassa per un isola lœgna del Japon. La rexon de un'etaa media insì bassa l'è perqè la metaa de la popolazion l'è faita su dei travaiœr dei ofici del paisot, dei maester e dei maguts cont i relative fameie q'inn minga del sit.
El pais al se trœva a 358 km a sud de Tokyo e a 68 km a sud de Hachijo, su l'isola Hachijojima - l'isola abitada plussee vexina.
Ind el 2014, l'ONG americana per la conservazion del turism One Green Planet la g'ha metud denter Aogashima intra i "13 sit plussee bell del mond de vider adree de morir".[3]
Servizi
[Modifega | modifica 'l sorgent]Scœla
[Modifega | modifica 'l sorgent]L'istruzion a Aogashima l'è garantida de una scœla elementar e una scœla media qe la ciapa su dei students forester per far-g no qe la scœla la sia sarada su per el numer picinin dessoravia dei students.
Strasport e posta
[Modifega | modifica 'l sorgent]
Su l'isola a g'è minga de servizi de strasport publeg e la distanza del port a'l pais l'è minga poca tant qe el desmenar-s a pee o in spiciola l'è dur. La strada plussee important de l'isola a l'è la Strada de la Prefetura de Tokyo 236.
L'isola l'è ligada a'l rest del Japon de la linia naval Izu Islands Development qe la ofriss cinq viaj de Hachijo a Aogashima e indree a la semana. Del 1993 l'elicoter Tokyo Island Shuttle de la Toho Aviation al viaja per 20 minuts del reoport de Hachijojima a Aogashima e indree vuna volta a'l dì.
El trafeg dei viture su l'isola l'è insì bass qe i semafer inn prategament futil. De tute i manere, ne g'è stait impientad domà vun in tuta l'isola arent a la scœla elementar perqè i fiœlits, aprœv de haver-g finid la scœla media, g'havarann de cert de lassar Aogashima per studiar-g a'l licee de Honshu, dejà qe i g'è minga su l'isola, innò qe i rede de strasport inn plussee desvilupad e qest impientament i vuta a tacar a ciapar conscenza dei segnal de la strada.
Su tuta l'isola g'è domà un ofici postal con do cavagne per la posta. Dejà qe'l pais l'è minga assee abitad e qe i cà inn poqe, i adresse i se scriven senza numer civeg ma domà co'l nom del destinatari.
Comunicazion
[Modifega | modifica 'l sorgent]Su l'isola l'è possibil de drœvar-g ol telefonin con la red 4G. L'internet l'è stait per long disponibil domà con l'ADSL ma, grazie a'l desvilup dei cablaj in fibra otega sotamarin, el servizi a banda ultralarga l'è iniziad ind el 2020. El cablaj in fibra otega l'è stait fait su del governo central de Tokyo e lassad in jestion a la NTT.