Antoni Boggia

De Wikipedia
Lombard Quest articol chì l'è scrivud in lombard, con la Noeuva Ortografia Lombarda
Litrat del Boggia

L'Antoni Boggia (Uri, 23 de dicember 1799 - Milan, 8 de avril 1862) a l'è stad un criminal italian, el prim sassin serial de l'apena nassud Regn d'Italia.

Biografia[Modifega | modifica 'l sorgent]

Nassud in sul lagh de Com, minga deslongh de la Svizzera, el gh'ha i so prim rebellot con la giustizzia, del Regn Lombard-Veneto, a vintcinch agn, per di cambiai minga pagade, el scapa donca in del Regn de Sardegna, indova che l'è menad via per rissa e tentad mazzament. El profita de 'na rivoeulta per tornà in Lombardia, indova che, grazzia al facc che 'l saveva el todesch, el troeuva un lavorà a Palazzi Cusan, sed del comand militar austriegh.

In del 1849 el mazza l'Angelo Ribbone e ghe roba 1'400 svanzighe, e l'è poeu desmembrad e scondud in la soa cantina. In del 1851 el proeuva a copà 'n ragionat a colp de ascia, e l'è condanad de la giustizzia austriega a trii mes a la Senavra, e 'l torna poeu liber.

El 26 de fevrer 1860 el fioeul de la Ester Maria Perrocchio, quella che ghe ficiava la cà al Boggia, el denonzia ai Carabiner Real che la mader a l'è descomparida e 'l giudes el descovriss che gh'è 'na procura falsa, fada de 'n nodar de Com, in favor del Boggia, e poeu el descovriss anca el so precedent e ghe fa controllà la cà, indova che troeuven el corp de la dona scondud, oltra a du alter cadaver.

El Boggia l'amet de havé mazzad quella sgent chi, ma el se deciara mat fina a l'ultem. A l'è condanad a mort per impicagion e l'è tacad su el 8 de avril del 1862. El so corp a l'è miss sota arent a Porta Lodoviga, menter 'l coo a l'è dad a l'Ospedal Magior e poeu dad al Cesare Lombroso per di analisi. A l'è stad el darrer civil condadad a mort a Milan fina a la segonda guerra mondial, desgià che 'l codes Zanardelli l'haveva abolid la pena de mort.

Riferiment[Modifega | modifica 'l sorgent]