Alicia Florrick

De Wikipedia
Lumbard ucidental Quest articol chì l'è scrivuu in lombard, grafia milanesa.

Alicia Florrick, nassuda Cavanaugh, l'è 'n personagg principal de la serie televisiva The Good Wife. L'è interpretada da la Julianna Margulies.

Biografia[Modifega | modifica 'l sorgent]

Miee del Peter Florrick, Procurator de Stat borlaa in desgrazia per on scandol de prostituzion, la torna a lavorà 'me avocatt in del studi Stern, Lockhart & Gardner, portada da Will Gardner, sò vegg compagn de scoeura de che l'è innamorada. Donca, da bona miee la se troeuva a fà de noeuv l'avocata e a gestì el scandol che l'ha ciappaa el marii cont i sò du fioeui: Zack e Grace.

Chichinscì la fà 'na relazion cont el Will Gartner, e a la fin de la stagion 3 el sò marii el se candida Governador de l'Illinois e lee 'l jutta fiss e 'l ghe staa vesin. In la stagion 5 inveci el Will el moeur coppaa in tribunal e lee la va in lutt e la se separa in cà dal marii.

In la stagion 6 la fa su on noeuv studi cont el sò amis Cary Agos e la sò veggia capa Dianne Lockhart. Dopo la se candida a Procuratora de Stat, la veng ma la gh'ha de dimettes dopo on scandol elettoral anca se innocent, vist che on ricontegg l'avaria faa perd ai democrategh la maggioranza qualifegada al Parlament de l'Illinois e donca el Partii l'ha faa on mugg de pression per fàlla dimett. Per rivà a la carega la gh'aveva de cavà via el conflitt de interess, e donca l'ha faa on contratt de bona sortida che 'l valeva domà ona voeulta andada in carega, ma a la fin per via de la sò fama grama dovuda al scandol a l'è minga riammetuda in del studi, e lee a l'inizi la voeur mocà de vess avocatt e scriv on liber in su la sò vita, ma poeu la se rend cont che l'ha gh'ha besogn de prategà e la patrocina a gratis on sò vegg client, per poeu tornà cont on sò noeuv studi con l'avocata di cauzion Lucca Quinn.

El sò marii in del frattemp el proeuva a candidàss ai primari democrategh de l'Iowa 'me President di Stat Unii, ma el perd clamorosament. Poco dopo ghe fan causa per negligenza e, vist i problema economegh el sò studi, la torna in del vegg studi.

In del frattemp la gh'ha 'na relazion cont el sò investigator, e 'na voeulta che 'l marii el troeuva l'investigator a cà de la Alicia in mudand el se inversa e lee la domanda el divorzi. Lu el ghe domanda de restà insemma a lu almen finna a la fin del process che 'l avaria avuu de fà.

La fin[Modifega | modifica 'l sorgent]

Dopo che la sò defesa l'ha mituu de bon in diffcoltà la Procura el Peter Florrick l'accetta on patteggiament de vun ann de libertà vigilada, senza nissuna reclusion. Comé in la scena iniziala de la serie lu l'è man in la man cont l'Alicia, ma lee la lassa per andà dal sò investigator, che poeu descovriss che l'era minga lu. Donca incontra la Dianne Lockhart che ghe tira 'na s'giafa per avè taccaa el sò marii lung la defesa del Peter. La serie la finiss cont lee che la se sistema la giacca, senza dà nissun'altra informazion.

Vos correlaa[Modifega | modifica 'l sorgent]