Wikipedia:Wikipedia

Quest articol chì l'è scrivuu in lombard, grafia milanesa.

La wikipedia (parnonziáa /ˈwikiˑpe:ˌdjɐ/) l'è ona enziclopedía (a gratis) che la se troeuva domà in su la red (ona forma stampada la gh'è minga).
La Wikipedia l'è scrivuda de gent che la mett a disposizion de la comunidáa telematega, e a gratis, el sò temp e 'l sò lavorà inscí de spantegà el savè e mettel a la portada de man de tucc.
Purtropp, ij articoj che vun el troeuva in su la Wikipedia, hin minga semper curáa proppi de bon, già che la gent che la se cruzzia de scrivij hin minga semper di "spezialista" del tema.
A bon cunt, el bell de la Wikipedia l'è che vun el pò semper dà ona man a giontà, mudà, e scanscellà articoj, inscí che, almanch in teoría, la qualidáa de la Wikipedia la cress semper pussée.