Wikipedia:Cinqu pilaster

Da Wikipedia.

Tutt i regol de Wikipedia se basen su cinqu pilaster che definissen i sò carateristich. Se pò dì che wikipedia la gh'ha minga regol fiss, foeura che quij cinch pilaster chì.

	Wikipedia l'è on'enciclopedia che la tegn dent tucc i element tipich di alter enciclopedij "generich", di enciclopedij "specialistich" e di almanacch. Wikipedia l'è minga ona collezion indiscriminada de informazion. Donca, l'è minga ona font primaria, ma domà secondaria; l'è nò on dizionari e nanca un palch per fa comizzi, e nanca un giornal; Wikipedia l'e minga el pòst per fà reclam, oppur on banch per provà l'anarchia o la democrazia; l'è nanca ona web directory, oppur on sitt per scriv i opinion, esperienz o argumentazion; tucc i contributor deven sfurzàss de andà dree a i politigh basaa su la verificabilità e su la proibizion de ricerch original.
	Wikipedia la gh'ha on punt da vista neutral: el voeur dì che quand se scriv o se modifica ona vos se pò minga esprimm domà on punt de vista. Bisogna riportà tutt i different teorii a propòsit de l'argoment trattaa in de la vos, e gh'è de trattai in manera ciara, imparziala e cont tutt i font (sicur), de manera che quij che leggen capissen e pòden, se voeuren, controllà. Su Wikipedia gh'è minga on punt de vista miglior o peggior di alter, e gh'è minga la veritaa rivelada. Quand se comincia a bozzà a propòsit de ona vos, se dev bloccà la vos, desmett de bozzà e rivà a on compromess in de la pagina de discussion de la vos.
	Wikipedia l'è libera, e donca el so contegnuu l'è modificabil liberament. Tutt i test vegnen rilasciaa sòta licenza libera GFDL e pòden vess citaa, distribuii, modificaa, venduu anca dal primm che passa. Gh'hinn nò di vos de proprietaa, e se pò no pretend che i alter faghen minga modificazion a ona vos. Libera el voeur dì anca che l'è vietaa mett dent material quattaa da copyright oppur concess cont ona licenza che la va contra la GFDL.
	Wikipedia la gh'ha on còdes de comportament, e donca bisogna rispettà i utent anca se semm minga d'accòrd con lor. I utent de Wikipedia gh'hann de comportàss civilment, senza fà attacch personaj o edit war e, per fàla curta, senza fà el pirla. Boeugna vess in bona fed e, almanch fin a quand l'è possibil, presumìla in di alter utent.
	Wikipedia la gh'ha minga di regol fiss, foeura che quij cinch regolett chì. Avii minga paura de fà i modifich, perchè l'è minga necessari vess perfett. Stii sicur che tutt i vecc version de ona vos vegnen salvaa, e l'è semper possibil andà a ripescàj; l'è anca possibil cattà una veggia version de ona vos giamò scancellada. Considera anca, a l'istessa manera, che se te scrivet ona vacada, el database la tegnarà bona in di ann a vegnì; Wikipedia l'è trasparent, e la gh'ha la memòria longa.