Streghe

De Wikipedia
Va a: navegá, truvá
Chest artícol a l'è scricc in Lumbàrt Orientàl, ortograféa unificàda Lombard oriental

Streghe (Strìe 'n bresà, Charmed en inglés) l'è 'l tìtol italià de 'n telefilm uriginàre dèi Stàti Ünìcc, publicàt dal 1998 al 2006 söl canàl de WB en Amèrica e sö Rai2, La7 e FOX en Itàlia. Streghe l'è fàda de 8 stagiù, töte de 22 puntàde, fò che le stagiù 5 e 6 che le ghe n'ha 23, per en totàl de 178 puntàde.

La stória[Mudifega | mudìfica 'l sorgènt]

La série la cönta la stória de 3 sorèle, Prue, Piper e Phoebe Halliwell che, dòpo la mórt de la sò nóna, Penny Halliwell, le g'ha ciapàt dei potéri màgich. Prue la pöl möer i laùr col pensiér, Piper la pöl blocà 'l tép e Phoebe la pöl véder endèl futùro. Pròpe quan che Phoebe la lès sö 'n encantézem söl Lìber de le Ómbre, töta la magìa la se straöda adòs a le sorèle e 'l mal, che 'l völ ciapàs töcc i potéri de la famìa Halliwell, el cumìncia a mandàga fórse catìe per desfà fò 'l trìo.
El mal el ghe rìa a copà giöna de le sorèle, Prue, che la làsa 'l trìo sènsa piö sigürèsa.
Menemà rìa 'n ótra sorèla, Paige, fiöla de Patty (la màma pò a de le ótre tré gnàre) e de Sam, el sò àngel biànch. Gràsie a Paige, tùrna a furmàs el trìo e le sorèle le pöl nà 'n nacc a combàter cutra 'l mal.

Personàgi[Mudifega | mudìfica 'l sorgènt]

Prue Halliwell[Mudifega | mudìfica 'l sorgènt]

Prue l'è la fiöla piö ècia, nasìda ai 28 de utùer del 1970. La g'ha 'n caràter pötòst decìs, l'è tacàda fés al sö laurà e la fà fadìga a 'namuràs. Prue la s'è 'namuràda apéna 'na ólta, de Andy Trudeau, sò sòcio quan che l'ìa picinìna. Però la g'ha ìt östès divèrse stórie.
La g'ha 'l potére dèla telecinézi, cioè de püdì möer i laùr col pensiér. Prima la püdìa doprà apéna i öcc, ma dòpo la g'ha tacàt a püdì doprà pò a le mà.

Piper Halliwell[Mudifega | mudìfica 'l sorgènt]

Piper, l'è la segónda de le fiöle, l'è nasìda ai 7 de óst del 1973. L'è "el cör de la famìa", come che la g'ha dìt la sò màma el dé de le sò spùze co Leo. Piéna de coràgio e de 'ntraprendènsa, Piper la g'ha sèmper cultiàt el sògno de déentà 'na chef profesiunìsta. La s'è sübet enamuràda de l'àngel biànch del trìo, el Leo.
Lé la g'ha 'l potere de la stàzi temporàl, cioè de püdì "blocà" le molécole dei còrp. Col pasà del tép, Piper la svelöpa pò a 'l potére de la acelerasiù temporàl, cioè de püdì "acelerà" 'l müimènt de le molécole e fàle s-ciopà.

Phoebe Halliwell[Mudifega | mudìfica 'l sorgènt]

Phoebe l'è la fiöla piö màta de töte. L'è nasìda ai 2 de noèmber del 1975 e la g'ha 'n ligàm strèt con töt chèl che g'ha a che fà col cör. Zà de sübet la se demóstra atènta a aidà chèi che i g'ha problémi, sura de töt i problémi de amùr, tat che la deènta la redatrìs de 'na rübrìca söl giornàl de San Francisco, el The Bay Mirror. La sò stória piö lónga l'è chèla ìda con Cole Turner, un démone che 'l vülìa copà le sorèle ma che pò 'l s'è 'namuràt de lé. Ön'ótra stória importànte l'è stàda chèla col Coop (en cupìdo).
Phoebe la g'ha 'l potére de la preegènsa, de ìga viziù del pasàt e del futùro. La g'ha svelöpàt pò a l'abilità de leàs de tèra de 'n pò de mèter e, piö en glià amò, l'abilità dè l'empatìa.

Paige Matthews Halliwell[Mudifega | mudìfica 'l sorgènt]

Paige l'è la "fiöla pirdìda", nasìda de 'na relasiù extraconiugàl de Patty Halliwell col sò àngel biànch, Sam Wilder. Relasiù 'ntra àngei e strìe i ìa prüibìde, isé i du genitùr i g'ha duzìt dà vià la pipìna. L'è nasìda ai 2 de óst del 1977.
Sicóme che l'è metà àngel biànch e metà strìa, Paige la g'ha 'l stès potére de Prue ma en pìt diferènt: difàti i sò potéri i è mes·ciàt con chèi dei àngei biànch. Lé la pöl pò a cürà le persùne e orbità, cioè de teletrasportàs 'ndóche la öl.