Segunda Curinz Capitel Ses

De Wikipedia

Lombard Occidental

Quel articul chì l'è scrivüü in Lumbard, cun l'urtugrafia insübrica ünificada.

Segunda Curinz[Modifega | modifica 'l sorgent]

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Ses[Modifega | modifica 'l sorgent]

1E intanta che laurum insèma, anca esurtum che vialter ricevii la grazia de Diu no vanamént: 2già che 'l dis:
«A un mumént cetabil t'huu sentii,
e in del dì de la salvéza t'huu jütaa».
Varda adèss el témp cetabil, varda adèss el dì de la salvéza!
3Dand nissüna causa de scarpüsc in de nagott, perchè 'l ministéri el sia no biasmaa. 4Ma recumandumm in de tüsscuss cumè ministér de Diu, in de tanta perseveranza, in di tribulaziún, in di necessitaa, in di afliziún estremm, 5in di bott, in di presún, in di instabilitaa, in di travaj, in di perd al sögn, in di digiún, 6in de püritaa, in de cugnussénza, in de paziénza, in de gentiléza, in del Spirit Sant, in del bén sénza ipucrisìa, 7in d'una parola de la veritaa, in de la puténza de Diu; per mèzz di arm de la giüstizia, de la driza e de la manzina[1], 8per mèzz de gloria e desunúr, per mèzz de fama cativa e bon report; cumè impustúr e vér, 9cumè no cugnussüü e bén cugnussüü, cumè dree a murì e, varda, vivum, cumè castigaa ma no metüü a mort, 10cumè faa trist e semper gh'èmm letizia, cumè pòr ma fasend sciúr tant personn, cumè avendugh nagott e tegnend tüsscoss.
11La nostra buca l'ha dervii per vialter, Curinz, el noster cör l'è slargaa: 12sii minga schisciaa in de nümm, ma sii schisciaa in de la vostra cumpassiún; 13e al medemm cuntracambi, disi cumè a bagaj, duarìuv vèss slargaa anca vialter.
14Sarìuv no metüü insèma suta un giuv divèrs cun quij che creden no: già che qual report el gh'è intra la giüstizia e l'iniquitaa? O quala fradelanza la gh'è intra la lüs e 'l scür? 15E qual'armonia la gh'è intra Crist e Beliar, o quala part la gh'è intra una persona fedela cun vöna che la cred no? 16E qual acordi 'l gh'è intra 'l témpi de Diu e i idul? Defàtt, nümm sèmm el témpi de Diu vivént, cumè Diu l'ha dii:
«Staruu de cà intra lur e cun lur caminaruu,
e saruu 'l lur Diu,
e lur sarànn la mia gént.
17Dunca, andii via del mèzz de lur
e che siuv separaa föra, el dis el Signúr,
e tuchee no una cossa impüra;
e mì ve ricevaruu,
e saruu a vialter un pader,
e vialter sarii a mì fiöö e tús,
el dis el Signúr ogniputént».

  1. o sinistra

Navigaziun[Modifega | modifica 'l sorgent]