Rouen

De Wikipedia
Va a: navegá, truvá
Lumbard ucidental Quest articol chì l'è scritt in milanes, ortografia classega.
Rouen
Blason Rouen 76.svg
Rouen panorama.JPG
Carte France geo.png
Pais Lo drapél de la France Frància
Regiù Haute-Normandie (prefetüra)
Departimènt Seine-Maritime (prefetüra)
Arrondissement Arrondissement de Rouen
(chef-lieu)
Cantù
Còdes Insee 76540
Còdes postàl 76000, 76100
Sìndech
Valérie Fourneyron
2008 - 2014
Intercumünalitaa CREA (siège)
Latitüden 49°26′38″ N
Lungitüden 1°06′12″ E
Altèssa söl mar 2 (mini) – 152 (maxi)
Süperfìs 21.38 km²
Abitàncc 111 553 ab.
(1. Gen 2011)
Densitaà 5 218 ab./km²

Rouen (inscì anca in Frances e Normann; Ruan in spagnoeu; Ruão in portoghes; Roano in italian storigh; Rouaan in olandes storigh; Rotomagus in latin; Ρατόμαγοϛ/Ratómagos in grech antigh) l'è ona città de la Francia del nord. La gh'ha ona popolazion de 111 553 abitant (dato del ginee 2011 [1]).
L'è voeuna di pocch città a 'vèggh la Legion d'Onor. L'è sede de on'arcidiocesi, e 'l sò vescov l'è 'l primatt de Normandia.

Geografia[Mudifega | mudìfica 'l sorgènt]

Rouen la se troeuva in de l'Alta Normandia (dipartiment de la Senna Marittima), de la qual l'è anca el capploeugh.
L'è traversada de la Senna e de alter trii cors d'aqua, cioè l'Aubette, el Robec e 'l Cailly.

Storia[Mudifega | mudìfica 'l sorgènt]

L'uniga torr del castell restada in pee

On primm sitt el s'è sviluppaa ai temp di Celta, e l'era la capital di Veliocass, on popol celtigh che 'l gh'eva on territori che 'l se spantegava per tutta la vall de la Senna, de Caudebec-en-Caux fina a Pontoise. La città vera e proppia l'è stada fada in sù la riva de destra de la Senna ai temp de l'August, e l'è vegnuda la segonda città pussee importanta de la Gallia dopo de Lugdunum (cioè Lion).

In del III secol la città l'ha vist on fort svilupp: se sa che 'l gh'era on anfiteater e di termi bei grand. A la fin del secol hinn scominciaa i invasion barbarigh e l'è saltaa foeura el primm vescov, el San Vitrisc.

El quattordes de magg del 841 Rouen l'è stada brusada di Vichingh (come la dis ona croniga del temp). I Vichingh hinn tornaa anca duu ann dopo; in del 911, dopo el trattaa de pas tra el Rollon e 'l re frances Carlo III, i Vichingh n'hann faa la capital del noeuv ducaa de Normandia.
In del 949 Rouen l'è stada sediada di Frances, ma el duca Riccard I (el Senza Paura) l'è riessii a batt i nemis.
Ai temp del duca Guglielm el Conquistador (anca re d'Inghilterra) la capital del ducaa l'è stada spostada a Caen. Intant Rouen l'era vegnuda on port bell important per i contatt con la region de Paris, oltra che on mercaa de s'ciav. El 26 de genar del 1096 i Giudee de Rouen (la comunità giudea pussee granda a nord de la Loira) hinn staa massacraa.
Anca dopo la conquista de l'Inghilterra, i duca de Normandia hinn staa despess a Rouen; l'è chì che l'è conservaa el coeur de Riccard I d'Inghilterra (ciamaa el Coeur de Leon).
In del 1150 Rouen l'ha ottegnuu el status de comun: l'era governada de on grupp de cent personn, e i sò abitant eren reggruppaa in corporazion de mestee. De Rouen el passava la saa per Paris e 'l vin per l'Inghilterra.
In del 1200 tacchen sù i lavorà per fà sù de noeuv la cattedral de Rouen, che l'era stada brusada.
In del 1203 Rouen l'è stada occupada di Frances (che hann costruii on noeuv castell, dopo d'avè traa giò quell vegg); la città però l'ha conservaa i sò libertà comunai, almanch fina al temp de Filipp el Bell, che trai alter robb l'ha faa scascià via on'altra voeulta i Giudee de Rouen.

I Ingles hinn tornaa in Normandia ai temp de la Guerra di Cent Ann: e defatt l'è staa chichinscì che l'è stada brusada viva la Giovanna d'Arch, el trenta de magg del 1431. La città però l'è tornada francesa vers la fin de la guerra, in del 1449.

Duranta el Renassiment Rouen l'ha conossuu on certo splendor coltural e economigh: per esempi, l'è vegnuda el port frances pussee important per el commerz cont el Brasil.
Intorna al 1530, on terz de la popolazion la vegn protestanta (ugonotta, cioè calvinista): la tension la cress semper pussee e la s'cioppa intorna al 1560; in del 1562 i Protestant ciappen el podè de la città. I Cattoligh hann sediaa Rouen, e i sò governant allora gh'hann domandaa aiutt ai Ingles, che hinn rivaa. A bon cunt, i Cattoligh hinn riessii a conquistà la città istess. In del 1591 el re Enrigh IV l'ha faa trà giò el castell, col lassà in pee domà ona torr.
De 'sto moment, Rouen l'è andada 'dree a la storia del rest de la Francia. In del 1870 l'è stada occupada di Prussian, menter ai temp de la Prima Guerra Mondial l'è servida 'me base di Ingles. I todesch l'hann occupada el noeuv de giugn del 1940 e s'hinn andaa via el trenta de agost del 1944.

Gent nassuda a Rouen[Mudifega | mudìfica 'l sorgènt]

Gemellagg[Mudifega | mudìfica 'l sorgènt]

Riferiment[Mudifega | mudìfica 'l sorgènt]

  1. Istitùto fransés de statìstica (INSEE) (www.insee.fr)