Raspadüra

De Wikipedia

Lombard Occidental

Quel articul chì l'è scrivüü in Lumbard, cun l'urtugrafia insübrica ünificada.
La preparassion de la raspadüra

La Raspadüra l'è 'na manera de preparà el furmai grana, servid cume d'le fetine raspade cun un curtel da 'na furma de Granon Ludesan o da alter furmai grana giuin, stagiunad dai quater ai ses mes[1].

La raspadüra l'è un mangià tipich d'la gastrunumia ludesana[1][2], ma la se mangia anca in d'le pruince de Pavia, Cremuna, Piasensa e Milan, indue la cunserva el stess num.

L'è servida de solit cume antipast, cun salam caciadù, nus o funs, ma la pöd es cunsümada anca sura al risot o a la pulenta.

La raspadüra l'è nassüda cume un mangià par i puaret: a l'urigin l'era raspada da furme de grana scartade par prublema de stagiunadüra, menter incö i en druade furme de buna qualità, stagiunade par es taiade sensa andà in brise[2].

Storia[Modifega | modifica 'l sorgent]

Quand le furme de grana i erun faie artigianalment in d'le casere d'le cassine, di volt capiteva che vegnevun föra mal. Par quest, el prim tai el pudeva avegh di prublema: alura el fatur el feva levà la part malada cun una lama granda, che duneva ai paisan[2] i rissul de furmai raspad.

Par quest la raspadüra l'è staia par tanti an un mangià bon apena par i por, menter incö l'è 'na pitansa rinumada par disnà e sene de laurà, vendüda anca in cunfession regal de gran lüss.

In d'i paes dal ludesan, in d'le giurnade dal marcà, l'è amò pussibil assist a la raspada: l'uperassion che la fà nass la raspadüra. I furmagè püssè preparad i dröun un turni a man che'l fà girà la furma e un particular curtel ricürv e piat cun dü manegh che in d'i stagion püssè frede el gh'ha bisogn da es scaldad.

Riferiment[Modifega | modifica 'l sorgent]

  1. 1,0 1,1 Granon Ludesan e Raspadüra. www.saporetipico.it. Recuveraa el 29-11-2009.
  2. 2,0 2,1 2,2 Tranquillo Salvatori. Raspadüra. Provincia di Lodi. Recuveraa el 29-11-2009.