Feiez

De Wikipedia
(Rimandad de Paolo Panigada)
Lumbard ucidental Quest articol chì l'è scrivuu in lombard, grafia milanesa.

El Paolo Panigada, alias Feiez (Crema, 12 luj 1962 - Milan, 23 dicember 1998) l'è staa on polistrumentista talian del grupp musegal Elio e le Storie Tese.

Oltra a sonà, el Feiez a l'eva on tecnich del sòn in del studi de registrazion milanes Psycho, indove 'l faseva di mix e di registrazion. L'ha sonaa in album de alter artista talian come Ligabue, i Pitura Freska, Timoria, Taglia 42 e Pierangelo Bertoli.

L'ha faa del teater insemma al Stefano Belisari (Elio) e al Claudio Bisio, che l'ha compagnaa in del spetacol Tersa Repubblica (1995).
El Feiez a l'è entraa a fà part di Elio e le Storie Tese in del 1988 cont el nòmm de Mu Fogliasch (perchè el diseva de vess on sassofonista slav) e l'ha contribuii a l'incision del primm album de la band Elio Samaga Hukapan Kariyana Turu. Tra i vari strument che l'ha sonaa duranta la soa carrera gh'hinn el sax (come in T.V.U.M.D.B.), i taster (in John Holmes), el bass (in Servi della Gleba) e la ghitara (Milza, Ti Amo, Cavo, Urna), oltra a vess staa corista e segonda vôs in d'on quaj de canzon (Vattene amore, Verso l'ignoto, Plagio Born to be Abramo, Urna...).

Come tucc i component di Elio e le Storie Tese, anca el Feiez l'ha dopraa on mugg de nòmm different: el s'è faa ciamà Mu Fogliasch, Luigi Piloni, Largo Factotum (per i sò grand capacitaa musegai e per i sò grand dimension), Paul Branigade, Luigi Panigada, Panino, Brother Punene, Zirio, Filz.

El gh'ha avuu anca moeud de partecipà al progett musegal de la Biba Band del bassista Faso. E l'è staa pròpri duranta vun di concert de questa band che l'è mòrt, colpii de on improvvis aneurisma, menter l'eva dree a sonà Rockin' in Rythm di Weather Report. La soa mòrt l'ha lassaa on voeud incolmabil in del grupp, che l'ha diminuii la soa produzion musegal e l'ha voruu minga cambiàll cont on alter musicista come lù.

I album Craccracriccrecr (1999) e Studentessi (2008) hinn dedicaa a lù. El primm el comenza cont el sò assolo de sax in T.V.U.M.D.B. (de Eat the Phikis, 1996), el segond el finiss con la canzon Single, canatada del Feiez per l'omònim programma radio del 1997 (che 'l gh'aveva come conduttor la Luciana Litizzetto e 'l Bruno Gambarotta).

Legamm de foeura[Modifega | modifica 'l sorgent]