Panatton
De Wikipedia
El Panatton (scritt anca panetton o panetùn) l'è un dolz tradizional milanes, che se mangia a Natal. El panatton l'è cognossuu in tutta l'Italia, e l'è diventaa el simbol de la gastronomia milanesa e de la cittaa de Milan.
Per fà el panetton se mes'cia insemma l'acqua, la farina, el buter, i oeuv, i candii, i ruschitt de naranz e de zeder, e l'ughètta.
Segond el dizionari del Cherubin, on temp, el panetton, quell ver (pesant on chilo o pussee anmò), se faseva domà per el Natal. In di alter temp de l'ann, i offellee faseven di panattonitt pussee piccinitt. E foeura de Milan ("nel contado"), el panatton l'era minga de farina de froment, ma de formenton, con dent di tocchej de pomm e di grann d'uga.
Al dì d'incoeu, la manera de coeus el panatton l'è mudada per vess in regola cont i regolament de l'agenzia europea de sanitaa: on temp le se lassava coeus per on temp pussee curt, de manera che la pasta la restava molla e l'uga la podeva fermentà on pocch, menter adess la cottura l'è pussee longa e el panatton l'è pussee succ de ona volta.
[Mudifega] Bibliografia
- Francesco Cherubini Vocabolario Milanese-Italiano, vol 3 (M-Q), Milano 1841 (articol "Panatton", p. 254)
