Maria Gaitana Agnesa

De Wikipedia
Lumbard ucidental Quest articol chì l'è scrivuu in lombard, grafia milanesa.
«[...]
se vedarà in d'on olter sit, in mezz,
ai squader, ai triangol, ai compass
e a tanc ordegn part drizz e part scavezz
on'oltra donna in att de no curass
di vanitaa del mond, ma che la tend
ai coss che i vertuos cerchen d'imprend.»
(Carl'Andreja Oltolina, Baltramina, 1793)
L'Agnesi in d'ona incision del XVIII secol.

La Maria Gaitana Agnesa (Montaveggia, 16 de magg del 1718 - Milan, noeuv de genar del 1799) l'è stada ona matematega, filosofa e benefattora italiana.

Vita[Modifega | modifica 'l sorgent]

Prima de vintun fradei, sorella de la composidora Maria Teresa Agnesa Pinottina, l'è nassuda in Brianza poch agn dopo l'anession de la Lombardia a l'Austria. La soa fameja l'era devegnuda sciora cont el vend la seda.

Ben prest la Maria Gaitana l'ha demostraa on'intelligenza foeura del comun, e ona propension per i lengov forest. El sò pader, el Peder Agnes, l'ha recognossuu e incoraggiaa i sò dot e l'ha deciduu de fàlla studià con di maester famos.

L'è staa inscì che lee l'ha poduu imprend polido (tant de ciappà el soranomm de Oracol Sett-lengov) l'italian, el todesch, el frances, el latin, el grech, el spagnoeu e l'ebraich. Despoeu l'ha scominciaa a studià filosofia e matematega, e la cà de fameja l'ha scominciaa a devegnì on salott frequentaa de intelettuai de tutta l'Europa. In quei inconter, l'Agnesi la esponeva i sò studi con di tesi filosofegh, regolt insemma in del 1738 cont el titol de Propositiones Philosophicae: 191 tesi con question de logica, botanega, cosmologia, ontologia, mecanega e pneumatologia. In d'on queidun de 'sti sagg, l'Agnesa l'ha deciaraa che per lee anca i donn gh'aveven el diritt de studià.

A bon cunt, in del 1739 la gh'ha ciamaa al pader el permess de devegnì monega, l'ha lassaa perd la vita mondana e l'ha scominciaa a studià algebra e geometria.

L'ha scominciaa a analizà l'oeuvera postuma del marches de L'Hôpital (Traité Analytique des Sections Coniques) e l'ha scrivuu giò 'n coment, mai publicaa, indè che la ghe ciamava ciariment e consili a matemategh important e cognossuu. In de l'istess period, quei autor medemm gh'hann ciamaa aiutt e colaborazion per giudizzi e coment sora di oeuver che eren dree a vess publicaa.

In del 1740, a vintiduu agn, la Maria Gaitana l'ha scominciaa on period de studi con pader Ramiro Rampinell, professor de fisega e matematega a Milan in del monastee di Olivetan (a la gesa de San Vitor), e pionier de la matematega analitega. Insemma al Rampinell, l'Agnesa l'ha studiaa el test de l'abaa Reyneau (Analisi demostrada, 1708) e l'ha lassaa perd l'intent de publegà el sò coment in sui sezion conegh; inscì, grazie anca l'aiutt del Rampinell e del Jacopo Riccati, l'ha scrivuu giò on test de analisi, i Istituzion Analitegh per la Gioventù Italiana, publicaa in del 1748 in italian e dedicaa a l'imperadris Maria Teresa. L'oeuvera la gh'ha 'vuu on gran sucess e l'è stada voltada anca in frances (1775) e ingles (1801), intant che i matemategh de tutt l'Europa n'hann parlaa ben e gh'hann ditt che l'era l'oeuvera pussee avanzada in del sò gener. L'Agnesa la gh'ha 'vuu i omagg anca del papa Benedett XIV, de l'imperadris Maria Teresa e del Goldoni.

In del 1750 l'ha sostituii el pader in de l'insegnament de la matematega a l'Università de Bologna, anca cont el permess ofizial del papa. Ma in del 1752 l'ha bandonaa l'insegnament universitari per dedicàss a oeuver de carità, ai studi privaa e a l'istruzion di fradei, sorell e famej de cà.

In del 1752, quand che l'è mort sò pader, la Maria Gaitana l'ha bandonaa del tutt la vita publega e la s'è dedicada a la cura di poveritt, di malaa, e a l'istudi de la Bibbia. L'ha trasformaa la soa cà de Vared in d'on ospedalett e l'è andada a viv cont on rosc de donn malaa. Per fà su di danee e mantegnì i sò malaa, l'ha venduu tucc i sò sostanz, e poeu la gh'ha ciamaa aiutt ai amis e ai istituzion.

In del 1771 el princip Antoni Tolomee Trivolz l'ha mettuu in pee a Milan l'ospedal cognossuu tant 'me Baggina (italian: Pio Albergo Trivulzio), e l'Agnesa l'è stada invidada a vess la direttora de la sezion di donn. In del 1783 l'è andada a viv lilinscì, anca se l'ha minga bandonaa i sò studi religios e l'ha segutaa a insegnà religion: ormai l'era ona teologa anca senza avè studiaa teologia.

L'Agnesa l'ha lavoraa a la Baggina per vintises ann, fina a quand l'è morta, in del 1799. La soa villa a Vared al dì d'incoeu l'è ona scoeula de musega e on ospizzi per i vegg.

Bibliografia[Modifega | modifica 'l sorgent]

Instituzioni analitiche ad uso della gioventù italiana, 1748
  • Maria Gaetana Agnesi, Propositiones Philosophicae, Milano (1738).
  • A.F. Frisi, Elogio storico di Donna Maria Gaetana Agnesi, ristampa della edizione milanese del 1799 curata e commentata da Arnaldo Masotti e Giuseppina Biggiogero, Scuola Tipografica del Pio Istituto dei Figli della Provvidenza Milano (1965).
  • C.B. Boyer, Storia della Matematica, Arnoldo Mondadori Editore, Milano (1990).
  • G. Lolli, La crisalide e la farfalla, Bollati Boringhieri, Torino (2000).
  • G. Tilche, Maria Gaetana Agnesi, la scienziata santa del settecento, Rizzoli, Milano (1984).
  • C. Truesdell, Archive for History of Exact Science, 40, pp. 113-142, (1989).
  • M. Mazzotti, "Maria Gaetana Agnesi: Mathematics and the Making of Catholic Enlightenment", Isis, 2001, 92: 657-683.read article Arqiviad qé: [1]
  • M. Mazzotti, The World of Maria Gaetana Agnesi, Mathematician of God, Johns Hopkins University Press, Baltimore (2007).