Luci Antòni Saturnin

De Wikipedia
Lumbard ucidental Quest articol chì l'è scrivuu in lombard, grafia milanesa.

El Luci Antòni Saturnin (Lucius Antonius Saturninus in Latin; 42-89) a l'è staa on senator e on usurpator Roman.

El Saturnin a l'è staa vun di ultim de la gens Antonia a entrà in Senaa, insema al pretor Antòni Nason, antigh tribun del pretòri. El pò dàss che 'l sia staa parent anca de l'Antòni Onoraa, on alter senator.

In del 73 (ò in del 84) l'è staa eleggiuu in Senaa, poeu l'è diventaa proconsul in Macedònia. Tra 'l 78 e 'l 81 l'è staa pròpretor in Giudea, poeu, a partì del 88, l'è staa nomenaa governador de la Germania de Sora. El 1 genar del 89 i soldaa di camp arent Magonza(de la legion XIV "Saturnina" e de la legion XXI "Rapax") l'hann proclamaa imperador contra el Domizian. Luu, vist che l'era anca inrabii per motiv personaj cont el Domizian (l'imperador, de fatt, el voreva redùgh i possediment de vign in Gallia), l'ha accettaa de guidà la revòlta.

Ma i sò leaa germanich hinn fermaa de l'esondazion del Reno e hinn staa battuu primma che 'l podessen rivà a Magonza e, in general, la revòlta l'è stada ben prest domada del general Aul Buci Lappi Massimm (e gh'è de savè che in de l'esercit mandaa a fermà la revòlta el gh'era anca el futur imperador Traian). Quest chì l'ha trovaa anca di letter del Saturnin, in di quaj lù el domandava ajutt, e je ha brusaa. Quand l'è staa ciappaa, el Saturnin l'è staa coppaa e 'l sò coo l'è staa portaa a Roma per ordin de l'imperador.

La legion XXI l'è stada mandada in Pannònia, al confin con la Dacia (contra la qual la gh'era ona guerra) e 'l Domizian l'ha faa sù ona legg per proibì aj dò legion de trovàss in de l'istess camp.

Bibliografia[Modifega | modifica 'l sorgent]

  • A cura de la Diana Bowder, Dizionario dei personaggi dell'antica Roma, Roma 1990Eldomm.

Vos correlaa[Modifega | modifica 'l sorgent]