Lambraa
Lambraa (Lambrate) a l'è on quarter de Milan, a 5 chilòmeter a nòrd-est del center, foeura de la cerchia ferroviaria. A l'è compris in de la zòna 3. El nòmm el vegn del fiumm Lamber, che ghe passa in mezz.
[Mudifega] Stòria
La stòria de Lambraa l'è ligada a quella de Milan, del qual probabilment in epoca romana a l'era el pòrt fluvial. Quand in del 1162 Milan l'è staa traa giò del Federigh I de Hohenstaufen, Lambraa l'è diventada on borgh imperial, indove hinn andaa a viv i milanes esiliaa. El faseva part de la Piev de Segraa.
Con la dominazion spagnoeula el borgh l'è diventaa on feud. Cont el rivà di armad del Napoleon a Milan, Lambraa l'è diventada on comun depersè (a part in del period 1808-1816, in del qual a l'è stada taccada a Milan). La fusion definitiva cont el capploeugh lombard a l'è avvegnuda domà in del 1923.
[Mudifega] I loeugh
Lambraa, come comun, a l'era dividuda in dò part:
- Lambraa de Sora
- Lambraa de Sòtta
Inoltra gh'eren vint frazion, trai quai la gh'è l'Ortiga, renduda famosa per la canzon del Walter Valdi Faceva il Palo.
A Lambraa gh'è anca ona fermada de la linea 2 de la metropolitana milanesa e ona stazion ferroviaria, la terza pussee granda de Milan dòpo quella Central e quella de Pòrta Garibaldi.
[Mudifega] Frazion de Lambraa
Cassina Cason, Casorett, Cassina Rosa, Cavrian, Cassina Oppi, Cassina San Gregori Vegg, Cassina Bettora, Cassina Biblioteca, Cassina Ortiga, Cassina San Faustin, Cassina Aqua Bella, Villa Landa, Villa La Palazzetta, Molin di Torrett, Molin Folla, Molin de la Costa, Molin de la Paja, Molin Polverera, Molin Lavanderia, Ortiga.
