Gianni Magni
El Gianni Magni (Milan, 16 de magg del 1941 - Milan, 16 de luj del 1992) l'è staa on ator e cantant italian.
L'ha scominciaa a esibìss in spetacoi de circo in del 1953. In del 1959 el s'è iscritt la scoeula de recitazzion del Piccolo Teatro de Milan, indè che l'ha studiaa anca ball e coreografia.
In del 1964 insemma a Roberto Brivio, Nanni Svampa e Lino Patruno el mett in pè el grupp de I Gufi, preja miliar del cabaret italian. Già che l'era on bravo ballerin e mimo, el gh'eva la scormagna de cantamimo.
In del 1969 l'ha lassaa el grupp, per via di polemegh che eren vegnuu foeura despoeu de la sortida del disch Non spingete scappiamo anche noi. Dopo de la fin de l'esperienza cont el grupp, l'ha lavoraa tant in television (RAI, Antenna 3 e TSI), teater e cinema e in general in del mond del cabaret milanes. L'ha anca incis on quai disch, per esempi vun de cover del Giovanni D'Anzi.
L'è mort a l'improvisa in del 1992, a 51agn, per on colp al coeur.