Giagum Capitel Düü

Quel articul chì l'è scrivüü in Lumbard, cun l'urtugrafia insübrica ünificada.

Giagum

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Düü

¹Mè fradèj, cun distinziún di personn gh'avii minga la féd del noster Signur gluriús Gesü Crist. ²Già che se un omm cunt un anèl d'or in de vest magnifegh el ven denter in de la vostra sinagoga, e anca 'l ven denter un por in de vest slisaa, ³e vialter dee atenziún speziala al qual chi 'l porta i vest magnifegh e disii: «Sètes giò chilò bén», e al por disii: «Stee là in pee, o sètes gio suta 'l mè scagn», ⁴avii minga faa distinziún intra vialter medem, e sii devegnüü giüdes de pensee malign?
⁵Scultee vialter, mè fradèj predilètt. L'ha minga cataa föra Diu i por del mund insci de vèss sciúr in de la féd e i eréd del règn che l'ha prumetüü a quij che 'l vören bén? ⁶Ma vialter avii desunuraa i por. Vi uprimen no i sciúr, e vi tiren a i tribünaj? ⁷Bestemen minga lur el bun nomm che l'è staa invucaa sura vialter? ⁸Però, se vialter cumpii la lég legala segund la Scritüra: «Te vuraree bén el to prossim cuma te medemm», fii bén; ⁹Ma se fii distinziún di personn, cumetii un pecaa, e sii cunvinciüü de la lég cuma trasgressúr. ¹⁰Già che chissessìa 'l usserv la lég intrega, ma 'l ufenda in d'un punt, el devén culpevul de tücc. ¹¹Già che chèll che l'ha dii: «Fà tì minga adültéri», anca l'ha dii: «Maza tì no». E se te fee minga adültéri, ma te mazet, tì te see devegnüü trasgressúr de la lég. ¹²Parlee vialter inscì e fee inscì cuma quij che hinn dree a vèss giüdegaa segund la lég de la libertaa. ¹³Già che el giüdizi sarà senza misericordia per chi l'ha faa minga la misericordia; la misericordia la triunfa sura 'l giüdizi!
¹⁴Che ütil l'è, mè fradèj, se quajdün el dis che l'abia la féd, ma 'l gh'ha minga i oper? La féd la po minga salvàll. ¹⁵Se un fradèll o una surèla hinn biòtt e manchen el mangià de ogni dì, ¹⁶e vün de vialter el ghe dis: «Vee vialter in de la pas, vi scaldii e vi sagulii», ma ghe dii minga chell che gh'hann besogn al so corp, che ütil l'è? ¹⁷In de l'istessa manera, la féd, se gh'ha minga i oper, l'è morta de se medema. ¹⁸Ma quajdün el dis, «Tì te gh'hee la féd, e mì a gh'huu i oper, famm tì vedè la tua féd senza i oper, e te fuu vedè la mia féd cun i mè oper. ¹⁹Tì te credi che gh'è vün Diu? Te fee bén--anca i demoni creden e tremen! ²⁰Ma te vöret savè, o ümán vöj, che la féd senza i oper l'è inütila? ²¹Abràm, noster pader, l'è staa giüstifegaa minga travèrs i oper, quand l'ha ufèrt Isàc, el so bagaj, sü l'altàr? ²²Te vedet che la féd l'opera insèma cun i so oper, e travèrs i oper la féd l'è faa perfèta, ²³e la scritüra l'è stada cumpida, che la dis: «E Abràm l'ha credüü a Diu, e 'l gh'ha cüntaa per giüstizia», e l'è staa ciamaa un amís de Diu. ²⁴Vialter vedii che travèrs i oper una persona l'è giüstifegada, e minga dumà travèrs la féd. ²⁵E in de l'istessa manera, anca Raab, la pütàna, l'è stada giüstifegada minga travèrs i oper, quand l'ha ricevüü i mèss e la j'ha mandaa föra per un'altra via? ²⁶Già che cuma 'l corp senza 'l spirit l'è mort, inscì anca la féd senza i oper l'è mort.

Navigaziun

• ← Indree a Capitel Vün
• Inanz a Capitel Trii →
• A l'indes