Gòrla (Milan)
Gòrla (Gorla) l'è on quarter de Milan.
La se troeuva in del nòrd-est (Municipi 2) de la città, tra i quarter de Turr e de Precòtt, arent a Viale Monza. L'è traversada de la Martesana. A Gòrla la gh'è ona stazion de la metropolitana milanesa, in sù la linia M1.
Stòria[Modifega | modifica 'l sorgent]
Gòrla la gh'ha on nòmm che 'l ven del latin gulula, cioè gora piscinina, in del sens de piccola zòna reparada.
L'è stada a longh on center agricol con vari vill, situaa longh la strada che de Milan la portava a la Villa Real de Monza, minga lontan de Sest San Giovann.
Gòrla l'è stada on comun autònom (che 'l faseva part de la Piev de Bruzzan) fina al 1920, quand che l'è stada unida a Precòtt per fà sù el noeuv comun de Gòrla e Precòtt. Quella azion chì la saria dovuda servì per evità l'union con Milan, che però l'è vegnuda in del 1923.
I Mòrt de Gòrla[Modifega | modifica 'l sorgent]
Gòrla l'è anca famosa per on event de la segonda guerra mondiala: el 20 ottober del 1944 i bomb di Anglo-American hann colpii i costruzion industriai de Gòrla, ma anca ona scòla elementara. In del bombardament de l'edifizzi hinn mòrt anca 184 fioeu.
In sul sitt de la tragedia al dì d'incoeu a gh'è on momument in onor a quei pòver pinitt e pòcch distant a gh'è on Musee de la Pas.
