Domm de Milan

De Wikipedia
Va a: navegá, truvá
Lumbard ucidental Quest articol chì l'è scritt in milanes, ortografia classega.
El Domm de Milan

El Domm de Milan l'è la gesa la pu granda de Milan, e la se troeuva in mezz a la Piazza del Domm, in del center de la cittaa. L'è vunna di costruziun gotich pussee famos e pussee grand del mond.

El Domm l'è dedicaa a la Santa Maria Nassent, e in scima a la gulia pu alta del Domm gh'è ona statoa tutta d'ora de la Madonna (ciamada, per l'appunt, La Madonnina).

Storia[Mudifega | mudìfica 'l sorgènt]

Dove che gh'è adess el domm, ona voeulta gh'era la cattedral veggissima de Santa Maria Maggior e la Basilica de Santa Tecla, la pussee granda di dò.

Quij che han decis de fabricà el Domm hin staa l'arcivescov Antoni de Saluzz e el padron de Milan Gian Galeazzo Visconti. In del 1418 el papa Martin V l'ha consecraa l'altar maggior.

In del 1400, dopo Filippin di Organi e Giorgio di Organi gh'è staa Marco Solari e Giovan Solari de Carona, in del XV secol Giovan Antoni Amadeo che l'ha faa sù el lanternin de la cupola, Gian Giacom Dolcebuono e Pellegrin Tibaldi, finna a tant che, in del 1572 San Carlo Borromeo l'ha consecraa la gesa, ancaben che la fabbrica l'era nanmò finida.

In del XV secol gh'han lavoraa dent Martin Bassi, Francesch Maria Richino, Lelio Buzzi e Carlo Buzzi, i Quadrio. In del XVIII secol han faa sù la gulia pussee alta, dove che gh'han miss desoravia la statua dora de la Madonnina.

Finalment, in del 1813 s'hin decis a finì anca la facciada, squas cinqcent ann dopo ch'hann mettuu giò la primma preja, dal moment che Napoleon el voreva toeu chì la corona de re d'Italia.

Per tutt el XIX secol el lavorà principal l'è staa quell de finii i guli, i decorazion de architettura e mett a post el porton principal, de bronz, faa de Ludovich Pogliaghi: tra quej che gh'hann lavoraa in di primm ann del Vottcent, podom regordà Luigi Acquisti.

In temp de la Seconda guerra mondial la Madonnina l'è staa coverta de strasc, per minga corr el ris'c de fà la gibigianna che la podess vess vista di aeroplan che vegneven a lassà giò i bomb. Dopo la guerra, el Domm, che gh'aveva avuu di dagn, l'è staa restauraa e al post di ultim port che eren anmò de legn gh'hann miss di port de bronz, faa di scultor Arrigo Minerbi, Giannino Castiglioni e Luciano Minguzzi.

La manutenzion de la cattedrala la pertocca a la Veneranda fabbrica del Domm, che la desmett mai de lavorà, e l'è per quest che a Milan se dis "la Fabbrica del Domm" per tutt quej lavorà che finissen pù.