Domenega di Oliv
La Domenega di Oliv l'è l'ultema domenega de Quaresma prima de la Pasqua. Con lee la scomincia la Setemana Santa.
L'è ona festività catolega, ortodossa e anca de ona quai confession protestanta.
Se regorda el moment che 'l Signor l'è rivaa a Gerusalemm in ocasion de la Pasqua, on quai dì prima de vess impresonaa, processaa e mettuu in cros, come regordaa in del Vangeli de Gioann (Gv, 12, 12-15):
|
«El dì dopo la gent che l'eva vegnuu per la festa e che l'ha sentuu che Gesù andava a Gerusalemm, l'ha ciappaa i brocch di palm e la gh'andava incontra e la vosava: Osanna! Benedett quell che 'l vegn in del nomm del Signor, el re d'Israell!. Gesù l'ha trovaa on asnin e 'l s'è settaa giò de sora, come gh'eva scrivuu: Vèggh nò pagura, tosa de Sion; ecco, ghe vegn el tò re, settaa giò su 'n puleder d'asnina.»
|
Per regordà quell moment chì, in de la messa de 'sta domenega, i brocch de oliva vegnen benesii del preved. A bon cunt, in del Vangeli se parla di palm: in lombard se parla de "oliv" perchè quella pianta chì l'era (e l'è anca 'dess) pussee spantegada in di nost band.