Datura (müsica)

De Wikipedia

Lombard Occidental

Quel articul chì l'è scrivüü in Lumbard, cun l'urtugrafia insübrica ünificada.

Datura l'è 'l nomm d'ün grüpp italiàn de musica dij discotech ("Eurodance") che se gh'ha metüü insèmm in del 1991. I sò cumpunent hin Ciro Pagano e Stefano Mazzavillani. Amparo Fidalgo la gh'ha cantàa ün frach de sò canzùn.

El nomm[Modifega | modifica 'l sorgent]

El nomm "Datura" el vegn da 'na pianta medicinàal del Messich duperàda daj striùn Yaqui in dij lùr rituaj mistich per rivà a la cugnusenza.
I cumpunent del grüpp gh'han tiràa scià 'stu nomm chì perchè hin apasiunàa de rob mistich, che gh'ha influenzàa ün frach de canzùn.

La cariera[Modifega | modifica 'l sorgent]

El grüpp l'è stàa fàa sü in del 1991, dopu che i müsicist Ciro Pagano (ch'el sunava la chitàra in del grüpp Gaznevada) e Stefano Mazzavillani (che gh'ha culaburàa cunt cantant cumè Patty Pravo,Ivan Cattaneo e i Righeira) gh'han incuntràa i DJ e produtùr de müsica Ricci e Cirillo. Dopu che gh'han firmàa ün cuntrat cunt la casa discugrafica "Trance Records", a la fin del 1991 gh'han fàa la canzùn Nu Style, in duvè la vus d'ün striùn la diseva el prugèt mistich e müsicàal dij Datura. La canzùn la gh'ha avüü ün bun success e l'è nàda denter in dij classifich del setùr.
In del 1992 l'è cuminciàa el grand success del grüpp: la canzùn Yerba del Diablo, pèzz de müsica "trance", gh'ha fàa vinc ai Datura el disch de or perchè gh'han vendüü 100.000 copij.
Dopu gh'han cuminciàa a sunà in dij discotech pussee impurtant d'Italia e gh'han metüü in pé ün spetàcul ch'el fàva venì in ment tücc i aspètt mistich dij canzùn, anca cunt la simulaziùn d'ün rituàal d'iniziaziùn in duvè duperàven anca incensi e pitùri. La cantànt Amparo Fidalgo la diseva in spagnöö dij fràas d'introduziùn in pussee de vüna canzùn.
In dal 1993 l'è stàa publicàa Devotion, cantàda da Billie Ray Martin (üna vòlta dij Electribe 101); 'sta canzùn chì l'è nàda denter i primm dès de la classifica dij disch pussee vendüü in Italia. In de l'istèss ann l'è vegnüü föra l'album Eternity, che gh'èva denter anca oler success cumè Passion, Mystic Motion, ma anca Devotion e la canzùn che la dà 'l nomm al disch.
In del 1994 i Datura han fàa la versiùn "Eurodance" de Fade to Grey, canzùn '"new wave" del 1980 del grüpp ingles Visage, cunt la culaburaziùn de Steve Strange, che'l gh'èva cantàa la versiùn uriginàal. In sü l'oltrapart deldisch gh'era la canzùn El Sueño, che gh'ha avüü ün frach de success in dij discotech e che l'èdiventàa anca ün cor cantàa in dij stadi. Dopu l'è stàa publicàa The 7th Allucination e i Datura hin stàa elegiüü cumè el grüpp de müsica "dance" de l'ann 1994.
In del 1995 i vann in de la casa discugrafica "Time Records" e fann venì föra la canzùn Infinity, fàda in colaburaziùn cunt i U.S.U.R.A., olter famùs grüpp Eurodance italiàn; in de l'istèss ann la vègn publicàda anca Angeli Domini, cantàda in latin da 'n cor che fa venì in ment i cant de gesa.
In del 1996 i Datura han fàa düü canzùn ispiràa ai religiùn: Mantra (buddism) e Voo-Doo Believe? (vudü), 'sta chì cantàda da Danny Losito dij Double Dee.
Olter success del grüpp hin stàa The Sign (1997) e I Will Pray (1998).
In del 1999, dopu la canzùn I Love to Dance (cantàda da Ben Volpelier Pierrot, üna vòlta cantànt dij Curiosity Killed the Cat) e dopu la mort del DJ Ricci, i Datura se gh'han ciapàa üna pausa; Pagano e Mazzavillani in 'stu temp chì gh'han fàa olter prugètt müsicaj.
Turnàj in del 2002, gh'han publicàa la canzùn Will Be One; in del 2004 gh'han fàa Summer of Energy]] in colaburaziùn cunt Gigi D'Agostino. Dopu i se gh'han dedicàa a fà nööf i lur canzùn vègi e a purtà innanz el prugètt ciamàa "Pezzi da 90" per fà scuvrì de nööf a tücc la müsica "dance" dij ann Nuvanta.

Members[Modifega | modifica 'l sorgent]

Culaburaziùn principaj[Modifega | modifica 'l sorgent]

Disch[Modifega | modifica 'l sorgent]

Album[Modifega | modifica 'l sorgent]

Disch singul[Modifega | modifica 'l sorgent]

  • 1991Nu Style
  • 1992 - Yerba del Diablo
  • 1993 - Eternity
  • 1993 - Devotion
  • 1994 - The 7th Allucination
  • 1994 - Fade to Grey (part A) / El Sueño (part B)
  • 1995 - Infinity
  • 1995 - Angeli Domini
  • 1995 - Mystic Motion '95
  • 1996 - Mantra
  • 1996 - Voo-Doo Believe
  • 1996 - From Here to Eternity
  • 1997 - The Sign
  • 1997 - Passion '97
  • 1998 - I Will Pray
  • 1999 - I Love to Dance
  • 2001 - Yerba del Diablo Part III
  • 2002 - Will Be One
  • 2004 - Summer of Energy

Ligam de föra[Modifega | modifica 'l sorgent]