Carlo Maria Maggi

De Wikipedia
(Rimandad de Carl Maria Maggi)
Lombard Quest articol chì l'è scrivud in lombard, con la Noeuva Ortografia Lombarda
Monument al Carlo Maria Maggi del 1890 in Piazza Mercant a Milan.
Rime varie, 1688

El Carlo Maria Maggi (lombard: Carla Maria Masg; Milan, 3 Magg 163022 april 1699) l'è stad un famos poeta e autor de comedie in milanes, famos anca per havé inventad el personagg del servidor Meneghin che l'è poeu diventad la mascara pussee popolara del carnaval ambrosian e fin el soranom de tucc i milanes. De sorapù l'è considerad el pader de la leteradura milanesa moderna.

Vita[Modifega | modifica 'l sorgent]

Fioeul unegh del Giovann Battista Maggi, asgiad mercant de or e seta, e de l'Angela Riva, el Carlo Maria Maggi el nass a Milan el 3 masg 1630 in de la cà de Porta Romana, de denanz al monaster del Lentasi.[1] El se laurea in utroque a Bologna in del 1649 e donca, despoeu un quaj viasg in oltre part d'Italia, el se stabiliss definitivament in patria, indova el 14 setember 1656 el sposa l'Anna Maria Monticelli, che la ghe darà vundes fioeui. El viv a Milan in fina al 22 avril 1699, serciad su de la stima di concitadin che 'n prezzaven la dotrina e la retituden con la qual el ten i important ofizzi de secretari del Senad, de insegnant de letere latine e greche in di Scoeule Palatine, de curador di confin e de soraintendent a l'Università de Pavia.

Granda fama, in patria e foeura, per i oeuvre leterarie per i quai el gh'ha volt onor e grand lod e l'è stad fad member de tante academie, in tra i quai la Crusca e l'Arcadia. De sgiovin el componn di melodrama, che poeu el refuda (Augusto in Egitto, Bianca di Castiglia, ecc.). El scriv anca prolegh, intermez, zene, La Griselda — tragedia derivada de la novella del Boccaccio — du drama sacher, Teopisto, e Il ritorno d'Azoto — in su la parabola del fioeul prodegh — la Ifigenia derivada de l'Euripide e la Troade derivada del Seneca. Ma de tute i soe produzzion teatrai se regorden specialment i comedie in vers, in di quai un quaj personagg el parla in lombard: Il Mancomale, Il barone di Birbanza, I consigli di Meneghino, Il falso filosofo. Ie componn in di ultem agn de vita. Quei comedie chì hann el merit de render popolara la figura del Meneghin, vegnud poeu la mascara milanesa per ecellenza. El Maggi el componn anca di lireghe in latin, in grech e in spagnoeul, tante in talian, in tra i quai minga poche de soget moral e religios. El comenza cont el seguì el gust del so temp; la soa fama de poeta l'era inscì granda ai so dì, che el Muratori el dubita minga de paragonàll al Dante e al Petrarca. Incoeu el Maggi ghe par versegiador corret, ma fregg e se 'n regorda squas domà i lireghe ispirategh de l'amor de patria. Pussee vive inn i poesie burlesche, tante di quai in lombard. In prosa el scriv orazzion latine e taliane, letere e la traduzzion del frances de du liber spirituai, i Sentimenti di pietà e Il ritiramento delle dame. A quest ultem el sgionta, coma apendiz, un quaj so Trattenimenti per le dame (Milan 1687).

Oeuvre[Modifega | modifica 'l sorgent]

El Maggi l'ha scrivud e in talian, e in latin e fin in spagnoeul.
In milanes el Maggi l'ha scrivud tante poesie e cinch comedie, con protagonista la mascara de Meneghin Pecenna.

I consili del Meneghin[Modifega | modifica 'l sorgent]

I consigli di Meneghino

In del pass de la comedia "I consigli di Meneghino", se ved l'esit "necessitàe" inscambi de "necessitaa", drovad al dì d'incoeu. L'inizzi:

I Maggiorengh de cà

ghe van per comandà;
O quij ch'inscì comporta i soeù interess,
O i soeù necessitàe; l'è on olter cunt.
...

—I consigli di Meneghino


El concors di meneghin[Modifega | modifica 'l sorgent]

In quest pass de la comedia "Il concorso de' meneghini", gh'è una bella difesa del parlà milanes. L'inizzi:

Fei vegnì dent tugg trì

Toson bon de cìarvell, e mei de coeur
C'hi biù genji, e spiret
par la reputazion del vost lenguagg,
...

—Il concorso de' meneghini


Il barone di Birbanzia[Modifega | modifica 'l sorgent]

Il barone di Birbanzia
PROLOGO.

Meneghino.
Bon di, i mee sciori ; se porrav savè
Cossa fa chi sta bella compagnia ?
Semm vegnuu a spassass via.
Hii faa ben , bon prò fazza ;
Se la zaina ten pocch drovee ona tazza,
...Il barone di Birbanzia

—450

Racconto di una paura dei ladri in casa[Modifega | modifica 'l sorgent]

In de la poesia "Racconto di una paura dei ladri in casa", el Maggi el descriv i efet de havégh i lader in cà. L'inizzi:

Par favv on pó de coeur, se n'hì besogn

contra i pagur che van attorna adess,
cont i solet spegasc del barba Togn,
ve scrivij de sta nogg on bel suzzess.
...

—Racconto di una paura dei ladri in casa


Il manco male[Modifega | modifica 'l sorgent]

Il manco male
No , bellissimi sciori,

Ma belli insci via là,
Per non più tediarvi andemm in scià
Come gli' hoo de dì tutta
L' istoria del gobbett che ni' indichee
Me men voeuja de pianse ,
Pensand eh' abbien sti sci or de digerì
Tutta sta gran luganega de sciansc.
....

—Il manco male


Trateniment de l'autor in villa[Modifega | modifica 'l sorgent]

In de la poesia "Trattenimento dell'autore in villa", el Maggi el conta su una sgiornada intrega passada in campagna. L'inizzi:

Sont a Lesma sol solett

par fà i cunt cont i Massé;
Bella vista e loeugh quiett
Da descorr conti i pensé.
...

—Trattenimento dell'autore in villa


Edizzion[Modifega | modifica 'l sorgent]

La catada pussee granda di soe oeuvre l'è quella del Ludovico Antonio Muratori (Milan 1700), che la ciapa denter rime varie, letere familiare e olter scricc. In de l'istess ann se meten foeura a Venezia anca i soe scricciure milanese restampade poeu cont el titol de Commedie e rime in lingua milanese (Milan 1701). In del 1728 se caten su i componiment latin in di Anecdota posthuma miscellanea. Antonio Cipollini, cont un studi in su l'autor (Milan 1900) el da una Scelta di poesie e prose edite e inedite.

Bibliografia[Modifega | modifica 'l sorgent]

  • Emilio De Marchi, Carlo Maria Maggi, Saggio, Milano 1885 e 1930;
  • Antonio Cipollini, I mss. milanesi e le poesie inedite mondane e sacre di Carlo Maria Maggi, Milano 1895;
  • Antonio Cipollini, Carlo Maria Maggi e le Consulte inedite, Milano 1899;
  • Federico Barbieri, Le rime e le commedie meneghine di Carlo Maria Maggi, Milano 1917;
  • Luigi Medici e Gian Antonio Maggi, Carlo Maria Maggi, Milano 1930.
  • Vincenzo Mengaldo, La «discoverta» del Maggi, in Belfagor, vol. 21, nº 5, 1966, pp. 563-592, JSTOR 26141767.
  • Circolo Filologico Milanese, Carlo Maria Maggi e la Milano di fine '600, Milano, Di Baio Editore, 1999. ISBN 88-7080-679-0.
  • Carlo Maria Maggi, Rime varie, In Firenze, nella Stamperia di S.A.S., 1688.

Interproget[Modifega | modifica 'l sorgent]

Ligam de foeura[Modifega | modifica 'l sorgent]

  • Carlo Maria Maggi, in su Treccani.it – Enciclopedie on line, Istitut de l'Enciclopedia Italiana.

Riferiment[Modifega | modifica 'l sorgent]

  1. Claudio Beretta, Letteratura dialettale milanese: itinerario antologico-critico dalle origini ai nostri giorni, Hoepli, 2003.