Canzes

Cheest artícul al è scrivüü in milanees, urtugrafìa clàssega.

Cartell in canzes a la Biofera 2006.

El Canzes, ciamaa anca Canzés l'è on dialett del brianzoeu (che l'è a soa vòlta on dialett de l'insubrigh) che l'è parlaa da circa 2100 persònn in del comun de Canz (Provincia de Còmm). L'è simel anca al comasch e al milanes. Per scrivel se dopera on'ortografia diversa del milanes classigh (cont i "Ü" e i "Ö" inveci de "U" e "OEU"). El sò lessegh l'è simel a quell del brianzoeu.

Esempi de lengua

«I radis, la brocchina, al toeuri, i foeuj, i brocch, la gemma, 'l fior, la pell quand la lassa 'l sambiocch; vangàggh in gir, desà, insidì e 'l sò cortell, la casciada, al can, la brusaroeula, on bel castell; al pedegagn, al cantir, la manuela, 'l fiocch, treppà la sciocca, sbroccà e trà a tocch; i tapp, la bora, al bigell e 'l sguazzon, la sugur, la filippa, la folcc e 'l resegon; la tacca, 'l gropp, i reccasc e la fassina, al caspi, la meda, portài sù in cassina; al tiir da corda, l'ova, 'l bussolott e i rampitt, al curlo, i pianton, al cobiett, i caenitt. Stimà on bosch in pee, cercànn vun da toeu, tra là e fa nà i legn dopo 'vèi purtaa foeu. Disan che i radis hann da sentì l'Ave Maria: forzi anca in quel gh'è on poo da magia.»

(Tiziano Corti, Tiritera di piant, 1993)

Proverbi

• I proverbi vegnan a taj perchè gh'hann mettuu cent ann a fài.
• Se pioeuv al dì da l'Ascensa, per quaranta dì semm minga senza.
• A San Bastian, la vioeula in man.
• Ambo: lavorà; terno: sugutà.
• Mej on ratt in bocca al gatt che on cristian in man a l'avvocatt.
• Gh'è tre qualità da donn: i donn, i dindonn e i dirlindonn.
• La man ca la fà nà la cuna la tegn in pee 'l mond.
• Chi mangia la gaina di oltar, impegna la soa.
• Chi sa 'l latin, loda l'aqua e bev al vin.
• La fevar quartana, i giovin ja rissana, ai vegg la fà sonà la campana.
• Var pussee on poo da fedascia che tutt al legn da la barcascia.
• Cent coo, cent crapp, cent cuu, cent ciapp.
• O da castan o da nos, ognidun gh'ha la soa cros.

Bibliografia

• AAVV, Triangolo Lariano, Comunità' montana del Triangolo Lariano, Canzo, 1980
• Tiziano Corti, "In ucasiun", Finito di stampare nel mese di giugno 2005 presso la Tipografia Artigiana Vallassinese via L.Oltolina, 9. Asso, Como. La committenza della stampa è della Parrocchia di Canzo, 2005
• Stefano Prina, "Al Cadreghin - gazetin di bagaj da Canz" (in partic. n° 9 bis del 2005). Stampato in proprio. Sede: Via Meda 40 - 22035 Canzo (CO), 2003-2007
• Gigliola Campiotti, "Proverbi e modi di dire Lariani", Ediz. La Libreria di Demetra, 1997
• Comitato Festa di Nost, "Librett da la Festa di Nost", 1988-2003.

Vos correlaa

• Canz (anca in dialett canzes)
• Dialett brianzoeu