Cantharellus cibarius

De Wikipedia
Va a: navegá, truvá
Lumbard ucidental Quest articol chì l'è scritt in milanes, ortografia classega.

El Cantharellus cibarius, mej cognossuu cont el nomm comun de Finferl, Finferlin, Gallinasc, o anca Gallett[1] (en lombàrt orientàl: Galüsì), l'è vun di fonsg pu cognossuu, casciaa e mansgiaa in tutt l'arch alpin e on poo depertutt.

On mugg de Finferlitt

Tratt Caratteristegh[Mudifega | mudìfica 'l sorgènt]

I tratt caratteristegh di finferlitt hinn la forma e 'l color del capell e del gamb. El capell, che de sollet l'è d'on color che 'l va del sgioldolin al sgiold bell fort compagn del rosssumm de l'oeuv, a l'è largh di duu ai noeuv ghej (centimeter), anca se di voeult, ma proppi de rar, el riva finn a quindes centimeter de diameter. La sova forma la someja on poo quella d'on pedrioeu cont i pared ondulaa. El gamb, che l'è bell curtin, ciovè di trii a ses ghej (de rar, ma proppi de rar, el riva anca ai vott o nouev centimeter), el se slarga vers el coo e 'l se sfinna a la bas. La carna del finferlin l'è gnucca, "spagosa", ma minga dura e la gh'ha on savor linsgerin ma ponsgent. Quand ch'hinn bej fresch, i finferlitt gh'hann on odor compagn de quell di mognagh. I spoeur del corp spongios in del capell hinn bej piscinitt. [2].

Finferlitt in mustra al marcaa

Habitat e Diffusion[Mudifega | mudìfica 'l sorgènt]

On soeur parfecc per i finferlitt: bosch de pesc

I finferl cressen su putost ben in di bosch de latifoeuj e conifer, soratutt in loeugh indovè che gh'è pesc. I finferlitt se troeuven despess in istaa e utunn In Uropa, Nordamerega, Sudamerega, e Asia.

Gastronomia[Mudifega | mudìfica 'l sorgènt]

Esempi de finferlitt drovaa in de la cusinna: Carna de Buscin in solsa de panera cont finferlitt

I finferlitt hinn staa drovaa in de la cusinaa uropeja degià de secoj e vegnen paciaa on poo depertutt in del Vegg Continent. Vegnen mansgiaa in soratutt in pitanz preparaa a la manera casciadora, e compagnen de sollet polenta, luganega, ris, e.i.v.

A l'è mej mansgiài minga cru i finferlitt perchè gh'hann dent la Chitina.[3]

Bollitt[Mudifega | mudìfica 'l sorgènt]

Refereriment[Mudifega | mudìfica 'l sorgènt]

  1. http://www.naturamediterraneo.com/forum/topic.asp?TOPIC_ID=51211
  2. Edred John Henry Corner: A monograph of Cantharelloid fungi. Oxford University Press, London (UK). 1966
  3. WELT (online)