Calvairaa
Calvairaa (Calvairate) l'è on quarter de Milan, a sud-est del centro stòrigh, arent al stradon Corso 22 Marzo-Viale Corsica, che la collega el centro de la città a l'areopòrt de Linaa, e poeu in direzion sud. El fa part de la zòna de decentrament 4.
El someja che 'l nomm el vegna del latin Mons Calvarius, perchè lì arent gh'era ona collinetta sora la qual a gh'era ona cappella con sù on quader del calvari[1].
Fina al 1873 l'era on borgh di Còrp Sant de Milan, cioè quell comun nassuu in del 1757 che 'l comprendeva tucc i paes che se trovaven appena foeura di mur spagnoeu milanes.
Al dì d'incoeu l'è on quarter soratutt residenzial e popolar: del vegg paes l'è restaa proppi nient.
El centro del vegg paes a l'è quella che al dì d'incoeu la se ciama Piazza Ferdinando Martini (lì arent de fatt a gh'è anmò la via Calvairaa).
In del Parch Marinai d'Italia gh'è staa, del 1911 al 1969 el noeuv Verzee. La parrocchia del paes a l'era la gesa de Santa Maria del Suffragio, che l'è stada fada in del 1577, trada giò e recostruida del tutt in d'on alter sitt in del 1896 e che on temp la se ciamava Gesa de Santa Maria che la Nass.
Not [Mudifega]
- ↑ Pierino Boselli, Toponimi lombardi, 1977
