Bergen-Belsen

De Wikipedia
Lombard Oriental Chest artícol a l'è scricc in Lumbàrt, ortograféa bresàna moderna.


Puzisiù del camp de Bergen-Belsen en Germània.

Bergen-Belsen, a ólte ciamàt apéna Belsen , l'è stat en camp de concentramènt nazìsta sitüàt en Bàsa Sasònia, a sudòvest de la cità de Bergen arènt a Celle.

En prensépe l'ìa 'n camp de internamènt per i prizunér de guèra (1940), ma dòpo l'è stat trasfurmàt endèn camp de concentramènt (1942), endóche vignìa 'mprizunàcc Ebrèi, Sénghegn e Omosesuài. De spès i prizunér i vignìa turtüràcc e 'n gran tàncc i finìa per mörer de fam e de fadìghe.

El camp de Bergen-Belsen l'è stat apò 'n "camp de ripòzo" per i prizunér dei óter camp che i éra piö bù de laurà, sfinìcc o tròp vècc.

Le cundisiù i è pegiuràde amò de piö quan che g'ha ambiàt a rià i prizunér trasferìcc dei camp orientài prìma de la liberasiù de chèsti öltem dei soldàcc de le fórse rüse soviètiche.

Làpide a l'entràda del camp.

El camp a la fì l'è stat liberàt dei britànic ai 15 de Bril del 1945, e sübit dòpo l'è stat sbatìt zó töt e bruzàt coi lanciafiàme per vìa de le infesiù de tìfo che s'ìa fat dét.

Endèl camp de Bergen Belsen gh'è mórt presapóc 70.000 persùne, tra le quàle Anna Frank e sò sorèla Margot Frank, mórte de tìfo 'ndèl Febrér o 'ndèl Mars del 1945 (se conós mìa de precìzo la dàta giösta), e du ex deputàcc fransés: Claude Jordery, mórt ai 9 de Febrér del 1945, e Augustin Malroux, mórt ai 10 de Bril del stès an.