Bèrghem Baghèt

De Wikipedia
Va a: navegá, truvá
Chest artícol a l'è scricc in Lumbàrt Orientàl, ortograféa ünificàda Lombard oriental
I Bèrghem Baghèt chi sùna al Lazarèt de Bèrghem l'öltem dé del Bergamo on Pipes
Ü di baghetér de la Bèrghem Baghèt

La Bèrghem Baghèt l’è la prima e l’önega bànda de baghèt al mónt e l'è nasìda in del 2006 a Imbìer in Pruìnsa de Bèrghem, ma dal Utùer del 2009 la s’è spostàda a Palasàch ‘ndóe l’è ospitàda da la Banda "Gioacchino Rossini".

La rezù de ès de la banda[Mudifega | mudìfica 'l sorgènt]

La Bèrghem Baghèt la se dà de fà isè che ‘l baghèt, ma ach i cansù e i sunàde de la tradisiù, i vàghe mia perdìde e i vègne mia desmentegàde.

L’è per chèsto che i sunadùr de la Bèrghem Baghèt, per fà cognòs ol baghèt, i’à pensàt bé de tirà ‘nsèma öna bànda, dezà che chèsta l’è de sigür piö de efèt e la é ciamàda piö de spès che ü baghetér desperlü o öna quach baghetér che i sùna ògne tat quàndo ghe càpita.

I völìa ach troà ü mètodo e tirà ‘n pé öna scöla de müzéga stödiàda apòsta per ol baghèt, isé che ‘l baghèt l' vègne piö sunàt a orègia, ma l' sìes stödiàt compàgn de töcc i óter istrümèncc con d’öna sò tècnica particolàr e la giösta cültüra müzicàla.

L’öltem iscòpo de la banda l’è chèl de rènt la manéra de fà sö i baghècc sèmper piö bùna, isé de ìga di strömèncc sèmper piö de qualità.

Ol costöm[Mudifega | mudìfica 'l sorgènt]

Ol costöm de la banda l’ nas da i stöde de l’azìenda Taglio Avion - "ol feder" che, metìt insèma chèl che i se regordàa amò i vècc i pastùr e troàt, pò ach con impó de fortüna, ü vestìt de l’època, la gh'è riàda a fà turnà ‘n véta i éstìcc di pastùr d'öna ólta.

I vestìcc de la Bèrghem Baghèt i è isé chèi di pastùr bergamàsch del prensépe del méla e nöf (1900) con in piö öna fàsa biànca co l’istèma de la bànda e di ghète ‘mpö piö belìne de chèle de l’època.

Ol tabàr, ol capèl nìgher, ol giché e la camìza i è pròpe chèi bergamàsch d'öna ólta, menimà i bràghe i ghe à dré a la manéra de estì di pastùr sguìser, dezà che l’éra normàl per i pastùr bergamàsch indà ‘n Sguìsera a portà a pascolà i pégore.

La scöla de baghèt[Mudifega | mudìfica 'l sorgènt]

La scöla l’è a Palasàch, s’pöl iscrìes töt l’an e l’è dervìda a töcc, de fati per i piö picinèi gh’è di córs pensàcc apòsta per lur. Ol córs l’è bazàt sö trì bazèi.

Ol prìm lièl per i principiàncc l’è pensàt per insegnà i prim laùr sö la fìzica del baghèt, sö i manére de tègnel in ùrden e ‘ncordàt e se ‘mpàra pò a dovrà l’iströmènt isé ‘de tiràn fò ü suòno che l’ düre. Se ‘mpàra pò i prim insegnamèncc söl solfègio ritmico, a sunà i nòte e i prime sunàde col baghèt.

Ol segónt lièl per i pràtech l’è pensàt per rinforsàs in del solfègio ritmico e per tacà a ‘mparà chèl melòdech. Isé s’ cumìncia a stödià per dientà pròpe padrù del iströmènt: arpègi, salcc, dovrà i cromatìsm e la scàla müzicàla.

Ol tèrs lièl, la scöla müzicàla l’è pensàda per per imparà 'l repertòre de la Bèrghem Baghèt che l’ vè sunàt in di fèste religiùze e ‘n di manifestasiù, per imparà a marcià ‘nsèma e a ‘ntunàs co i óter sunadùr de la bànda.

Bergamo on Pipes[Mudifega | mudìfica 'l sorgènt]

La Bèrghem Baghèt l'à tiràt in pé ol Bergamo on Pipes ol prim fèstival internasiunàl de cornamüze che l' s'è tegnìt al Lazarèt de Bèrghem dal 17 al 19 de Setèmber del 2010. Chèsto fèstival l' gh'avrès de tègnes pò ògne dù agn.

Ol sito internet de la banda[Mudifega | mudìfica 'l sorgènt]

http://www.berghembaghet.it/